Թուրքական Dünya Bülteni լրատվական կենտրոնի փոխանցմամբ`այսօր Ստամբուլում պետք է տեղի ունենար 2010 թվականի մայիսի 31-ին գրանցված «Մավի Մարմարայի» միջադեպի գործով երրորդ և վերջին դատական նիստը: Առաջին երկու նիստերը տեղի են ունեցել նոյեմբերի 6-ին և 7-ին:
Հեռակա ամբաստանյալների կարգավիճակում են «Մավի Մարմարայի» միջադեպի ժամանակ Իսրայելի գլխավոր շտաբի պետ Գաբի Աշքենազին, Իսրայելի ռազմածովային ուժերի հրամանատար Էլիեզեր Ալֆրեդ Մարոնը, Իսրայելի ռազմաօդային ուժերի հետախուզության պատասխանատու Ավիշայ Լևին և Իսրայելի հետախուզության նախարար Ամոս Յադինը: Թուրքական դատախազությունը նրանց համար պահանջում էր 18,000 տարվա ազատազրկում:
Որպես այսօրվա նիստի և ընդհանրապես ողջ դատավարության հետաձգման պատճառ նշվում են իսրայելական կողմի գործադրած ճնշումները: «Մավի Մարմարայի» գործով դատավարությունը կվերսկսվի 2013 թվականի փետրվարի 21-ին:
