Ադրբեջանական APA լրատվական գործակալության փոխանցմամբ` ԱՄՆ-ում Վրաստանի դեսպան Թեմուր Յակոբաշվիլին կարծում է, որ իր առաքելությունն ավարտված է զբաղեցրած պաշտոնում: Այս մասին նա գրել է Facebook-ի իր էջում:
Նա հավելել է, որ իր որոշման մասին իրազեկել է արտգործնախարար Մայա Պանջիկիձեին. «Բոլորը գիտեն ամերիկյան ուղղությամբ Վրաստանի ձեռքբերումների մասին, և կարիք չկա դրանք կրկնելու: Հատուկ շնորհակալություն եմ ցանկանում հայտնել Վրաստանի նախագահին՝ իմ երկրին ծառայելու հարցում ինձ բացառիկ հնարավորություն տալու համար»:
Վրաստանի արտգործնախարար Մայա Պանջիկիձեն, մեկնաբանելով դեսպանի հրաժարականը, հայտարարել է, որ իրենք արդեն իսկ դիտարկում են նրա տեղին հավակնող թեկնածուների հարցը: Պանջիկիձեն հավելել է, որ մոտ ժամանակներս ակնկալվում են ևս մի քանի դեսպանների հրաժարականներ:
Սրանից առաջ էլ Պանջիկիձեն հայտարարել էր, որ իր համար նպատակահարմար չէ Յակոբաշվիլիի հետ աշխատելը, քանի որ նա կիսում է երկրի նախագահի կուսակցության հայացքները:
