Այս տարվա դեկտեմբերից իտալական Alitalia ընկերությունը չվերթներ կսկսի դեպի Հայաստան: Այս մասին այսօր լրագրողների հետ հանդիպման ժամանակ հայտարարեց «Արմենիա» միջազգային օդանավակայաններ ընկերության գլխավոր մենեջեր Մարսելո Վենդեն՝ ողջունելով Alitalia ընկերությանը և նրան հաջողություն մաղթելով Հայաստանում:
ՀՀ-ում Իտալիայի դեսպան Բրունո Սկապինին իր գոհունակությունը հայտնեց, որ իտալական Alitaliaընկերությունը հայտարարել է Հայաստանում գործունեություն սկսելու որոշման մասին. «Ես զգում եմ, որ այս որոշումը պատմական է դառնալու: Իտալիայի և Հայաստանի միջև ուղիղ կապը անհրաժեշտություն է Հայաստանի համար: Կարծում եմ, որ այս որոշմամբ Alitalia-ն նպաստելու է միջազգային հարաբերությունների և Հայաստանի տնտեսության զարգացմանը»:
Նրա խոսքով՝ հաշվի առնելով, որ Հայաստանն այսօր դեպի ծով ելք չունեցող պետություն է, ինչպես նաև ՀՀ սահմանների ներկայիս վիճակը, այս չվերթները նոր հնարավորություն են և կամրապնդեն մեր երկու պետությունների միջև գոյություն ունեցող հարաբերությունները: Դեսպանը նշեց, որ այսօր Հայաստանում ավելանում է հետաքրքրությունը իտալական արտադրանքի նկատմամբ: Դրա վկայությունն է առևտրաշրջանառության մեծ ծավալը, ՀՀ զբոսաշրջությունը, որոնց մեջ եվրոպացիների շարքում առաջին տեղում իտալացիներն են: «Alitalia-ի կողմից թռիչքների ներդրումը կնպաստի, որ մեր հարաբերությունները էլ ավելի ամրապնդվեն»,- հավելեց Բ. Սկապինին:
Alitalia ավիաընկերության տարածաշրջանում գլխավոր մենեջեր Ջովանի Սիմոնինիի խոսքով՝ չվերթները կիրականացվեն շաբաթը երկու անգամ: Տոմսի արժեքը, նրա բնորոշմամբ, բավականին մրցունակ է՝ երկկողմանի տոմսը դեպի Հռոմ կարժենա 299 եվրոյին համարժեք դրամ, իսկ այլ ուղղություններով՝ սկսած 349 եվրոյին համարժեք դրամից: Հռոմում ինքնաթիռը կլինի առավոտյան ժամը 7-ին, որը թույլ կտա օգտվել աշխարհի տարբեր երկրներ չվերթներից. «Մենք շատ երկրներում ենք ներկայացված և գիտենք, թե որքան հայեր կան աշխարհի տարբեր ծայրերում ու կարծում ենք` կօգնենք: Ընկերությունը նոր կառուցվածքով է հանդես գալիս, նորացրել է ինքնաթիռների պարկը, մոտ 75 նոր ինքնաթիռ է ձեռք բերվել, դեռ սպասում ենք 20-25 ինքնաթիռների: Մյուս բոլոր ինքնաթիռները վերակահավորվել են: Դրանք միջինը վեցուկես տարեկան են: Պատրաստ ենք նոր ներդրումների և գոհացուցիչ արդյունքների դեպքում պատրաստ ենք ավելացնել թռիչքների հաճախականությունը»:
Հարցին, թե «Զվարթնոց»-ի ծառայությունները «Արմավիա» ավիաընկերությունը չափազանց թանկ է անվանում, Alitalia-ի կարծիքով` ինչպիսի՞ն են դրանք, Ջ. Սիմոնինին պատասխանեց, որ իրենք չափազանց գոհ են «Զվարթնոց»-ի հետ կնքած պայմանագրից, սակայն մյուս օդանավակայանների հետ հրաժարվեց համեմատել` նշելով, որ համադրելի չեն:
Միաժամանակ նա հերքեց, որ Alitalia-ն կարող է հետաքրքրված լինել «Արմավիա»-ի գնմամբ:
