ԱԺ ՀՀԿ խմբակցության քարտուղար Հովհաննես Սահակյանի խոսքերով՝ Սերժ Սարգսյանն առաջին անգամ չէ, որ կոռուպցիայի դեմ պայքարի խնդիրներ է բարձրացնում: «Նախագահը բազմաթիվ հանդիպումներ է ունեցել ոստիկանության, արդարադատության խորհրդի և այլնի հետ, վեր հանել խնդիրները: Պարզապես եթե քաղաքական ուժը կենսունակ է և մտադիր է քաղաքական դաշտում երկար ժամանակ գործունեություն ծավալել, նրա ամենօրյա աշխատանքը կարող է դիտվել նախընտրական PR: Նախագահը համակարգում է երկրում տեղի ունեցող իրադարձությունները, և եթե կան խնդիրներ, և նախագահը մտահոգվում է, ես վատ բան չեմ տեսնում»,- «Կենտրոն» հեռուստաընկեության «Ուրվագիծ» հաղորդման եթերում հայտարարել է ԱԺ ՀՀԿ խմբակցության քարտուղարը:
Նա ասել է, որ նախագահի ուշադրության մշտական սևեռում կա այդ խնդիրներին, և առաջինը հենց ՀՀԿ-ն է բարձրացրել և քննարկման առարկա դարձրել խնդիրները: Խնդիրն այլ է. «Կոռուպցիան մշտական պայքար է պահանջում։ Դա բույս չէ, որ արմատները հանես ու չաճի: Տարբեր ժամանակահատվածներում տարբեր դրսևորումներ է ունենում, և դրա համար պետք է մշտական պայքար»:
Հովհաննես Սահակյանն ասել է, որ կոռուպցիայի դեմ պայքարի հանձնաժողովը մշտապես գործել է, և հաջողություն ունենալու համար պետք է հավատանք և համախմբվենք, ամբողջ հասարակությունը համախմբվի և օգնի, որ այդ միջոցառումները կյանքի կոչվեն:
Հարցին, թե ինչու իշխանությունն ու բիզնեսը չեն տարանջատվում, Հովհ. Սահակյանը պատասխանել է, որ պետք է իշխանությունն ու բիզնեսը տարանջատվեն, և դա չպետք է անի միայն ՀՀԿ-ն: Տարբեր քաղաքական ուժեր, որ դերակատար են, պետության մեջ, պետք է իրենք ևս պայքարեն, օրինակ՝ ԱԺ գործարարներ չբերելով:
«Եթե դուք նայեք, կտեսնեք, որ ՀՀԿ ցուցակով որևէ բիզնեսմեն խորհրդարան չի եկել: Եվ եթե բոլոր քաղաքական ուժերը կամք ցուցաբերեին և հետևեին այդ օրինակին, մեր գործը հեշտ կլիներ»,- ասել է Հովհաննես Սահակյանը:
Նա անդրադարձել է նաև այս տարի արտագաղթի և արտագնա աշխատանքի մեկնելու մտահոգիչ թվերին՝ ասելով. «Երբ մարդը արտագնա աշխատանքով փորձում է ընտանիքը պահել, դրա մեջ վատ բան չեմ տեսնում: Երբ գնում-չեն գալիս, դա է մտահոգիչ: Աշխարհը բաց է»:
