ՀՀԿ շենքի տանիքից ընկած և մահացած 27-ամյա շինարար Դավիթ Գևորգյանի մահվան վայրի վերաբերյալ ոստիկանության նախնական պարզաբանումը սխալ էր ընկալվել:
«Առաջին լրատվական»-ի հետ զրույցում ՀՀ ոստիկանության հասարակայնության հետ կապի և լրատվության վարչության աշխատակից Արմեն Մալխասյանն ասաց, որ դեպքի առնչությամբ նախապես իր կողմից տրված պարզաբանումը սխալ է ընկալվել լրատվամիջոցներից մեկի կողմից, որից հետո այդ սխալը տարածվել է այլ լրատվամիջոցներով: Ուստի Արմեն Մալխասյանն ասաց, որ, քննչական տեղեկանքի համաձայն, 27-ամյա շինարար Դավիթ Գևորգյանը մահացել է Երևանի Մելիք-Ադամյան-2 կիսակառույց շենքի տանիքում աշխատելու ժամանակ:
«Այսինքն՝ այդ Մելիք-Ադամյան 2 հասցեն նույն Հանրապետական կուսակցության շենքն է, որի վերաբերյալ փորձագետը տալիս է եզրակացություն` օգտագործելով «կիսակառույց շենք» բառերը, քանի որ տանիք չունեցող շենքը համարվում է կիսակառույց»,- մեկնաբանեց Արմեն Մալխասյանը:
Հիշեցնենք, որ ավելի վաղ «Առաջին լրատվական»-ի հետ հեռախոսազրույցում ՀՀԿ շենքի տանիքի վերանորոգմամբ զբաղվող ԱՃՕ շինարարական ընկերության շինարարության պատասխանատու Ռուբեն Կարսյանը նշել էր, որ Դավիթ Գևորգյանը տանիքի վերանորոգմամբ զբաղվելիս ընկել է շենքի տանիքից: