Ռուսաստանը չի մոռանա այն ողբերգությունը, որ ապրել է հրեա ժողովուրդը Երկրորդ համաշխարհային պատերազմի տարիներին։ Այս մասին, ինչպես հայտնում է rus.ruvr.ru–ն, հայտարարել է ՌԴ նախագահ Վլադիմիր Պուտինը՝ Իսրայելի նախագահ Շիմոն Պերեսի հետ հանդիպման ժամանակ:
Պուտինը նկատել է, որ Մոսկվայում բացված Հանդուրժողականության թանգարանը ևս մեկ ընդհանուր ավանդ է քսենոֆոբիայի, նացիոնալիզմի դեմ պայքարիում:
«Վստահ եմ, որ այս կենտրոն կայցելեն ոչ միայն Ռուսաստանի՝ ծագումով հրեա քաղաքացիները, այլև բոլոր քաղաքացիները՝ ցանկացած դավանանքի ու էթնոսի ներկայացուցիչ»,- ասել է Պուտինը: Երկրի ղեկավարը նաև հիշեցրել է, որ վերջերս Իսրայելում բացվել է Կարմիր բանակի զինվորներին նվիրված հուշարձան:
Խոսելով երկկողմ հարաբերությունների մասին՝ Պուտինն ընդգծել է, որ Ռուսաստանի ու Իսրայելի միջև զարգանում է համագործակցությունը՝ դեղագործության, էներգետիկայի, բժշկական սարքերի, տիեզերքի ու այլ ոլորտներում:
Իր հերթին՝ Իսրայելի նախագահը շնորհակալություն է հայտնել Պուտինին իր երկրի ու հրեա ժողովրդի նկատմամբ վերաբերմունքի համար: «Ես եկել եմ այստեղ, որպեսզի Ձեզ շնորհակալություն ասեմ: Ես հուսով եմ ու վստահ, որ Ռուսաստանը հետագայում ևս տեղ չի տա ռասիզմին ու ատելությանը»,- ասել է Շ. Պերեսը: