«Առաջին լրատվական»-ի զրուցակիցն է բնապահպանության նախարար Արամայիս Գրիգորյանը:
– Պարոն Գրիգորյան, Արարատյան դաշտավայրում գործող բազմաթիվ ձկնաբուծական տնտեսությունների կողմից արտեզյան ջրերի անխնա օգտագործման պատճառով այդ տարածաշրջանում հիմա բավականին լուրջ ջրային խնդիր է առաջացել: Նախորդ կառավարությունն աշնանը որոշակի քայլեր ձեռնարկեց վիճակը շտկելու համար: Այժմ ի՞նչ վիճակ է տիրում:
– Կա միջգերատեսչական հանձնաժողով, որը նախնական աշխատանքներ է կատարել, լուրջ աշխատանքներ են իրականացրել: Այդ մասին մենք վերջերս նաև վարչապետի հետ ենք զրուցել, և կա նրա հանձնարարականը, որ ևս մեկ անգամ իրականացնենք խորը ուսումնասիրություն, և այն բացթողումները, այն խնդիրները, որոնք դեռևս առկա են, կարողանանք լուծել: Դա կարևորագույն խնդիր է մեզ համար, և մենք պիտի կարողանանք այդ ոլորտում նույնպես հաջողություններ արձանագրել: Առաջիկայում Բնապահպանական տեսչությանը առանձնահատուկ հանձնարարականներ կլինեն, որպեսզի Արմավիրի և Արարատի տարածաշրջաններում ուսումնասիրվեն բոլոր ձկնաբուծական տնտեսությունները: Եվ նրանք, ովքեր չափից ավելի շատ են ջուր օգտագործում, դրանց ուշադրություն կդարձնենք և կնվազեցնենք: Եթե լինեն անօրինական հորեր, միանշանակ ամեն ինչ անելու ենք, որ դրանք փակվեն՝ անկախ այն հանգամանքից, թե դրանք ում են պատկանում:
– Դուք ունե՞ք տվյալներ, թե այս պահին որքան ապօրինի արտեզյան հորեր են գործում:
– Մենք ունենք որոշակի տվյալներ, բայց այդ ոլորտում արդեն աշխատանքներ են կատարվել, և կան փակված հորեր: Մենք ուզում ենք վերաուսումնասիրություն կատարել, որպեսզի ավելի հստակ կարողանանք ներկայացնել արդյունքները:
– Իսկ Արարատյան դաշտավայրում որքա՞ն օրինական և ապօրինի ձկնաբուծական ընկերություններ են գործում: Եվ արդյոք այդ չափը թույլատրելի՞ է այդ տարածաշրջանի համար:
– Ես այս պահին չեմ կարող ասել, որովհետև դա մեր ենթակայության տակ չէ, որպեսզի հստակ հաշվարկ կատարենք, թե քանի սուբյեկտ է աշխատում, բայց դրանք բավականին շատ են:
– Ասում եք, թե ձկնաբուծության հետևանքով Արարատյան դաշտավայրում ստեղծված իրավիճակի մասին վերջերս զրուցել եք Հ. Աբրահամյանի հետ, և նա խնդիրները լուծելու հստակ հանձնարարականներ է տվել: Հայտնի է, որ նորանշանակ վարչապետը նույնպես այնտեղ խոշոր ձկնաբուծական ընկերություն ունի. նա դա չհերքեց տարեվերջին ոլորտին վերաբերող մի օրինագծի քննարկման ժամանակ, և այդ առումով շահերի բախում առաջացավ: Շրջանառվող տեղեկությունների համաձայն՝ նրա այդ ընկերությունը նաև որոշակի ապօրինի գործունեություն է իրականացրել: Այդ խնդրին անդրադարձ եղե՞լ է:
– Ես տեղեկացնեմ, որ վարչապետն ինքը չունի ձկնաբուծական ընկերություն: Միգուցե իր հարազատների հետ կապված եք դուք հարցնում:
– Բայց նա իր այդ ելույթում չթաքցրեց, որ ունի:
– Ես չեմ ասում, որ թաքցրել է կամ չի թաքցրել, ես ասում եմ, որ վարչապետը չունի: Միգուցե իր հարազատների անունով է ձևակերպված, միգուցե սեփականատերերը հարազատներն են, բայց մենք պայմանավորվել ենք, որ ձկնարդյունաբերական բոլոր ընկերություններն անպայման պիտի կարողանանք ստուգել:
– Գաղտնիք չէ, որ պաշտոնյաներն իրենց բիզնես-սեփականությունը հիմնականում գրանցում են իրենց հարազատների անունով, բայց իրենք էլ կառավարում են և իրենց ազդեցության լծակներով դրանց համար բարենպաստ պայմաններ ստեղծում: Տվյալ դեպքում չե՞ք կարծում, որ Հ. Աբրահամյանը կօգտագործի վարչապետի իր հզոր լծակներն ու իր ձկնարդյունաբերության զարգացման համար ավելի լավ պայմաններ կստեղծի:
– Ես ձեզ կխնդրեի այդ մասին վարչապետին հարցնել, որովհետև ընդամենը երեկ նա ամբողջությամբ բացատրեց, թե ինչ ունի և ինչ չունի:
– Կառավարության արդեն ընդունված ծրագրում հատուկ նշված է, որ առանձնահատուկ վերաբերմունք են ցուցաբերելու գյուղատնտեսության նկատմամբ: Էկոնոմիկայի նախարար Կարեն Ճշմարիտյանն էլ մեզ հետ զրույցում կարևորելով գյուղատնտեսության ոլորտը՝ հատուկ շեշտեց ձկնարդյունաբերության զարգացման և այդ ոլորտում նոր տեխնոլոգիաների ներդրման մասին: Չե՞ք կարծում, որ այդ ոլորտի է՛լ ավելի ընդլայնումը Արարատյան դաշտավայրում է՛լ ավելի մեծ խնդիրներ կառաջացնի:
– Ոչ, բացարձակապես ոչ: Ես ընկալեցի ձեր հարցը: Դա առավել մեծ հնարավորություն կտա, որ մենք ավելի արդյունավետ օգտագործենք ջուրը: Խոսքը ջրի օգտագործման փակ ցիկլի մասին է, ինչը որոշակի ծախսեր է պահանջում: Եվ այդ առումով մենք պիտի համագործակցենք ձկնարդյունաբերողների հետ: Բնականաբար, առաջիկայում նաև կուսումնասիրվի, թե ինչ միջոցներով՝ վարկերով, վարկերի սուբսիդավորմամբ: Դա դեռ ծրագիր է, որը մենք պիտի կարողանանք իրականացնել, և որը հնարավորություն կտա անցնել այդ ցիկլին: Այսօր մենք պիտի կարողանանք վերջիվերջո ջրի խնդիրը կարգավորել:
– Եթե հայտնաբերվի, որ Հ. Աբրահամյանին կամ, ինչպես Դուք եք ասում, նրա բարեկամներին պատկանող ձկնաբուծական ընկերություններում անօրինական գործունեություն է իրականացվում, որպես նրա ղեկավարած կառավարության նախարար՝ կաշկանդված չե՞ք լինի այն վեր հանել և օրինական դաշտ բերել:
– Այս պահին ձեզ հետ խոսում եմ և չեմ կաշկանդվում: Եվ ընդհանրապես՝ վարչապետն ինքն է բոլոր խնդիրները դրել: Եվ անկախ այն հանգամանքից՝ իմ հարազատինը կլինի, թե ձեր հարազատինը, որևէ խնդիր չկա: Բոլորն էլ պիտի աշխատեն օրենքի սահմաններում: Այսօրվա կառավարությունում հարցն այսպես է դրված՝ մենք պետք է ամեն ինչ անենք, որ կարողանանք դրված խնդիրների համար լուծումներ գտնել:
– Իսկ հնարավո՞ր է՝ նոր վարչապետն իր բիզնեսն ընդլայնելու նպատակով ոլորտում այնպիսի քաղաքականություն վարի, ինչի արդյունքում փոքր ձկնարդյունաբերողները կուլ գնան խոշորներին:
– Դա բնապահպանության նախարարի խնդիրը չէ, դա շուկա է, և նման բան ես չեմ տեսնում:
– Նման դեպքերում մեզ մոտ պաշտոնական լծակներն էլ են օգտագործվում, և չի բացառվում, որ այդ նպատակին ծառայեցվեն նաև ձեր ղեկավարած նախարարության լծակները:
– Նման բան ես չեմ տեսնում, եթե դուք տեսնում եք, ինձ ուղղությունը տվեք:
Լուսանկարը` PanARMENIAN Photo-ի
