«Հարավային հոսք» գազատարի շինարարության վրա կծախսվի ոչ թե 15,5 միլիարդ եվրո, ինչպես նախատեսվում էր, այլ 16 միլիարդ եվրո: Այս մասին Bloomberg գործակալությանը հայտնել է նախագծի փոխղեկավար Ալեքսեյ Սերեբրյակովը:
Նշվում է, որ գումարի չափը դեռևս նախնական է, հստակ ծախսերը հայտնի կդառնան 2013թ. կեսերին` տենդերների ավարտից հետո: «Հարավային հոսք»-ի ծովային տեղամասերի գինը նախկինի նման գնահատվել է 10 միլիարդ եվրո, իսկ ցամաքային տեղամասերինը՝ վեց միլիարդ եվրո:
Նոյեմբերի 8-ին նաև հայտնի է դարձել, որ գալիք շաբաթ Բուլղարիան «Հարավային հոսք»-ի վերաբերյալ ներդրումային որոշում կստորագրի:
Հիշեցնենք, որ հոկտեմբերի 31-ին վերջնական ներդրումային որոշում է կայացվել «Հարավային հոսք» գազատարի հունգարական հատվածի կառուցման վերաբերյալ, որի երկարությունը 229 կմ է:
«Հարավային հոսք»-ը Սև ծովով կհասնի Բուլղարիա, ապա կբաժանվի երկու ճյուղի. առաջինը Հունաստանով կհասնի Իտալիայի հարավ, իսկ երկրորդը՝ Սերբիայով դեպի Հունգարիա և Ավստրիա: