Այսօր Հայաստան են ժամանել ԵԽԽՎ Հայաստանի հարցով համազեկուցողներ Ջոն Պրեսկոտն ու Ալեքսիս Ֆիշերը: Եթե Պրեսկոտի համար հայաստանյան հյուրընկալությունը նոր երևույթ չէ, ապա գերմանացի Ալեքսիս Ֆիշերը առաջին անգամ է Հայաստանում:
Համազեկուցողները Հայաստանում հանդիպելու են իշխանության հետ և ուսումնասիրեն, թե ինչպես է Հայաստանը կատարում մարտի 1-ից հետո ԵԽԽՎ տված ցուցումները, որոնք արտահայտվել են մի քանի բանաձևերի տեսքով:
Այցելության ուշագրավ պահն իհարկե այն է, որ այցելությունը կայանում է ընդդիմության մարտի 17-ի հանրահավաքի նախաշեմին և հանրահավաքի ընթացքում համազեկուցողները լինելու են Հայաստանում:
Իշխանությունը թերևս կփորձի այդ առիթն օգտագործել և հանրահավաքի հանդեպ առավելագույն հանդուրժողություն ցուցաբերելով համազեկուցողներին համոզել, թե ինչքան հանդուրժող և ժողովրդավար է դարձել ու ինչքան արագ է ժողովրդավարանում:
Մյուս կողմից սակայն, չի բացառվում հակառակը, որ իշխանությունը կփորձի սադրանքներ կազմակերպել և համազեկուցողների աչքի առաջ վարկաբեկել ընդդիմությանը: Չի բացառվում նաև, որ համազեկուցողների Հայաստան կատարած այցի ընթացքում իշխանությունը նաև քաղբանտարկյալներից որևէ մեկին կամ գուցե մի քանիսին ազատ արձակի, այդպիսով թե նրանց փորձելով առաջընթաց ցույց տալ, թե նաև ներկայացնել ընդդիմության հետ երկխոսության պատրաստակամություն, մարտի 1-ի հանրահավաքի պահանջների, մասնավորապես քաղբանտարկյալների ազատ արձակման մասով:
Դա նաև ընդդիմությանը հնարավորություն կտա մարտի 17-ի հանրահավաքի մասնակիցների մոտ արդյունավետ հաշվետվություն ներկայացնել և հասարակությանը ասել, որ պայքարն ու ակտիվությունը տալիս են պտուղներ:
Ընդհանուր առմամբ, համազեկուցողների հերթական այցելությունը, ինչքան էլ որ կիսով չափ այն առաջինն է` Ֆիշերի առումով, հազիվ թե մեծ նշանակություն ունենա Հայաստանի ներքաղաքական զարգացումների վրա: Չի բացառվում, որ այդ այցելությամբ ԵԽԽՎ-ն պարզապես փորձի լուծել Հայաստանում նշմարվող բավական դինամիկ զարգացումներում իր նշանակալից դերակատարությունը, իսկ աշխարհաքաղաքական իմաստով ասած` իր փայն ունենալու հարցը:
Իսկ թե դրա համար ինչպես կպահեն իրենց համազեկուցողները, ում հետ ինչ կպայմանավորվեն, ինչ կտեսնեն ու ինչի վրա աչք կփակեն այս անգամ, կերևա նրան այցի ընթացքում: