Մինչև տարեվերջ Սիրիայում մարդասիրական օգնության կարիք ունեցողների թիվը կհասնի 4 միլիոնի: Այս մասին հայտնել է ՌԴ ԱԳՆ պաշտոնական ներկայացուցիչ Ալեքսանդր Լուկաշևիչը: Նրա խոսքով՝ Սիրիայում տիրող մարդասիրական իրավիճակը անհանգստություն է առաջացնում Մոսկվայում: Այս մասին հայտնում է RIA Novosti-ն:
«ՄԱԿ-ի Մարդասիրական հարցերի համակարգման վարչության վերջին գնահատականներով՝ մարդասիրական օգնության կարիք ունեցողների թիվը մոտենում է 3 միլիոնին և առաջիկա ամիսներին կարող է հասնել 4 միլիոնի՝ ձմռան ցրտերի և բռնության սրման պատճառով»,- ասել է Լուկաշևիչը Մոսկվայում կայացած բրիֆինգի ժամանակ:
Դիվանագետը նաև հավելել է, որ ՄԱԿ-ի Փախստականների հարցերով գերագույն հանձնակատարի տվյալներով՝ Սիրիայի հարևան երկրներում գրանցված փախստականների թիվը գերազանցել է 360 հազարը. Հորդանանում ՝ 106 հազար, Լիբանանում՝ 102 հազար, Թուրքիայում՝ 101 հազար, Իրաքում՝ 45 հազար, իսկ Հյուսիսային Աֆրիկայի երկրներում ՝ մոտ 8 հազար:
«Տարեվերջին սպասվում է նրանց թվաքանակի ավելացում մինչև 710 հազարի: Ըստ այդմ՝ Սիրիայի ներսում ժամանակավորապես տեղահանվածների թիվը կազմում է ավելի քան 1 միլիոն»,- հավելել է նա:
