Գերմանիայում մինչ օրս ամերիկյան հատուկ ծառայությունների նախկին աշխատակից Էդվարդ Սնոուդենին ձերբակալելու օրդեր չի տրվել: ITAR-TASS-ի տեղեկացմամբ՝ այս մասին հայտնել է Գերմանիայի ներքին գործերի նախարարության ներկայացուցիչը:
Նրա հայտարարությունը հնչել է ԱՄՆ Ազգային անվտանգության գործակալության (ԱԱԳ)՝ Գերմանիայի քաղաքացիներին էլեկտրոնային գաղտնալսման հանգամանքները պարզաբանելու համար Սնոուդենին Գերմանիա հրավիրելու Գերմանիայի ընդդիմադիր կուսակցությունների մի շարք ներկայացուցիչների պահանջների ֆոնին: Նրա բացահայտումներից հետո հայտնի դարձավ, որ ԱԱԳ-ն գաղտնալսել է նույնիսկ Գերմանիայի դաշնային կանցլեր Անգելա Մերկելի բջջային հեռախոսը:
Իր հերթին, Գերմանիայի արդարադատության նախարարության ներկայացուցիչն ասել է, որ Գերմանիայի կառավարությունը Սնոուդենին հրավիրելու համար պետք է մի շարք իրավական հարցեր պարզի, մասնավորապես, պետք է իմանա ամերիկացիների տեսակետը:
Բացի դրանից՝ խոսքը Սնոուդենի «հնարավոր ձերբակալության և նրա արտահանձնման համար շրջանակային պայմանների» մասին է, պետք է նաև ստուգել՝ արդյոք Սնոուդենի գործողությունները պատժելի՞ են գերմանական իրավունքի տեսակետից:
Սնոուդենը հիմա Ռուսաստանում է, ոտեղ նրան ժամանակավոր ապաստան է տրվել: ԱԱԳ-ի գաղտնալսման մասին սկանդալի հետաքննության կոմիտեն նրան կուզենար հարցաքննել որպես վկա: Գերմանիայի ընդդիմությունը կարծում է, որ դա պետք է լինի Գերմանիայում, իսկ ըստ կառավարության՝ դա հնարավոր է նաև Ռուսաստանում: