Երեկ գիշերը Կոտայքի մարզի Բալահովիտ գյուղի մոտակայքում հնչած կրակոցների փաստի առիթով ԲՀԿ առաջնորդ Գագիկ Ծառուկյանի ազգականը՝ Էդվին Թադևոսյանը, և դեպքի մյուս մասնակից Մաթևոս Կարապետյանը ձերբակալված են, իսկ Ծառուկյանի մյուս ազգականը՝ Վարդան Հարությունյանը, դեռևս փախուստի մեջ է:
Հիշեցնենք, որ դեպքը տեղի է ունեցել երեկ երեկոյան: Բենզալցակայանում տեղի էր ունեցել ծեծկռտուք, որի ժամանակ հնչել էին կրակոցներ: Ոստիկանության քրեական հետախուզության գլխավոր, Կոտայքի մարզային վարչությունների և Կոտայքի բաժնի ծառայողների ձեռնարկած միջոցառումների արդյունքում պարզվել է, որ ժամը 17.00-ի սահմաններում Բալահովիտ գյուղի 1-ին փողոցի հարակից բենզալցակայանի մոտ 1985թ. ծնված Մաթևոս Կարապետյանը, 1986թ. ծնված Էդվին Թադևոսյանը և 1980թ. ծնված Վարդան Հարությունյանը կենցաղային հարցերի շուրջ վիճաբանել են միմյանց հետ, ինչի ընթացքում Էդվին Թադևոսյանն իր մոտ պահվող ատրճանակից 3-4 կրակոց է արձակել:
Նշենք, որ Էդվին Թադևոսյանը Ծառուկյանի մորաքրոջ թոռն է, իսկ Վարդան Հարությունյանը՝ Էդվին Թադևոսյանի հորաքրոջ տղան: Թադևոսյանն աշխատում է նախագահի աշխատակազմում, իսկ ավելի վաղ աշխատում էր Վերահսկիչ պալատում՝ որպես առաջատար մասնագետ: Թեև նա Ծառուկյանի ազգականն է, սակայն անկուսակցական է և երբևէ ԲՀԿ-ական չի եղել: Նա նույնիսկ անցած տարվա սեպտեմբերին կայացած Աբովյանի քաղաքապետի ընտրություններում մտադիր էր առաջադրվել որպես թեկնածու՝ դրանով դեմ դուրս գալով Ծառուկյանի փեսայի՝ գործող քաղաքապետ Կարո Գուլոյանի դեմ, ինչը, սակայն, տեղի չունեցավ:
Փաստի առթիվ հարուցվել է քրեական գործ՝ ՀՀ քրեական օրենսգրքի 258 հոդվածի 4-րդ մասի և 235 հոդվածի 1-ին մասի հատկանիշներով:
Կատարվում է նախաքննություն:
