Գերմանիայի իշխանությունները կոռուպցիայի գործով խուզարկություն են իրականացրել եվրոպական տիեզերական EADS կոնցեռնի գրասենյակներում` հաղորդում է BBC-ն:
Հետաքննությունը կապված է 2007թ. Ավստրիային վաճառած Eurofighter կործանիչների հետ:
Դատախազ Թոմաս Սթեյնկրաուս-Կոշը հաստատել է խուզարկության անցկացման փաստը ու նկատել, որ կասկածվում է «մի քանի մարդ»:
EADS-ի ներկայացուցիչն իր հերթին հայտարարել է, որ ընկերությունը օգնում է իշխանություններին հետաքննության անցկացման գործում:
Որոշ տեղեկություններով՝ խուզարկություններ են տեղի ունեցել կոնցեռնի 3 գրասենյակներում:
2007թ. հունիսին Ավստրիայի պաշտպանության նախարարությունը ստորագրել էր 15 Eurofighter-ի գնման պայմանագիրը, թեև նախապես որոշվել էր գնել 18 կործանիչ` 1,63 մլրդ եվրոյով: 15 ինքնաթիռներից վերջինը մատակարարվել էր 2009թ.:
2008թ. ավստրիական դատախազությունը ստացել էր գործարքի մասին տեղեկություն ու պարզել, որ BAE Systems-ի նախկին աշխատակից Ալֆոնս Մենսդորֆ-Պույին կաշառքներ է բաժանել BAE կորպորացիայի անունից:
Անձամբ Մենսդորֆ-Պույին հերքել է իրեն ուղղված մեղադրանքները: Նա ձերբակալվել էր 2009թ. փետրվարին ու կալանքի տակ գտնվել 5 շաբաթ: 2010թ. SFO-ն հրաժարվեց նրա նկատմամբ հետաքննությունից, երբ BAE-ը գործարք կնքեց Մեծ Բրիտանիայի դատախազության հետ: Կոնցեռնը ընդունեց իր մեղքը ու համաձայնեց վճարել ավելի քան 450 մլն դոլար:
Իր հերթին Բրիտանիան խոստացավ հրաժարվել BAE-ի նկատմամբ հետագա հետապնդումից՝ կապված գործի հետ:
Սեպտեմբերին հայտնի դարձավ EADS-ի ու BAE-ի հնարավոր միավորման մասին, սակայն հոկտեմբերի կեսին գործարքը տապալվեց հիմնական բաժնետերերի տարաձայնությունների պատճառով:
