ՄԱԿ-ի Անվտանգության խորհուրդը նիգերիական «Բոկո Հարամ» խմբավորումը ներառել է «Ալ-Քաիդայի» հետ կապված ահաբեկչական կազմակերպությունների ցուցակում ու նրա դեմ պատժամիջոցներ սահմանել: Այս մասին հայտնում է ITAR-TASS-ը՝ հղում անելով ՄԱԿ-ում Ավստրալիայի մշտական ներկայացուցիչ Գերի Քուինլենին, ով գլխավորում է «Ալ-Քաիդայի» դեմ պատժամիջոցների հարցերով ԱԽ կոմիտեն:
Նրա խոսքով՝ ԱԽ-ն անհերքելի ապացույցներ ունի առ այն, որ խմբավորման անդամները նախապատրաստություն են անցել «Ալ-Քաիդան իսլամական Մագրիբի երկրներում» խմբավորման գրոհայինների հետ, մասնավորապես սովորել են ստեղծել ինքնաշեն պայթուցիկներ, ինչպես նաև ճակատ առ ճակատ կռվել Մալիում իսլամիստների հետ: Քուինլենը հիշեցրել է, որ 2012-ի նոյեմբերին խմբավորման առաջնորդ Աբուբաքար Շեկաուն զորակցություն էր հայտնել «Ալ-Քաիդային» Իրաքում, Աֆղանստանում, Եմենում, Սոմալիում, Սիրիայում և այլ երկրներում:
Խմբավորումն ահաբեկչական ճանաչելու խնդրանքով հանդես էր եկել Նիգերիան, որը հանդիսանում է ԱԽ ոչ մշտական անդամ:
