Վերնիսաժի կրակոցների գործով մեղադրյալ Գոռ Առաքելյանի փաստաբան Երեմ Սարգսյանը լրագրողների հետ զրույցում ընդգծել է, որ շատ սուղ է խոսելու՝ պահպանելով նախաքննության գաղտնիությունը, սակայն առաջադրված մեղադրանքը սպանության փորձի մասով անհիմն է համարել: Մեղադրանքը ներկայացվել է ՔՕ 34-104 հոդվածի երկրորդ մասի 1, 6, և 10-րդ կետերով և 235 հոդվածի 1-ին մասով: Այսինքն՝ 2 և ավելի անձանց ապօրինաբար կյանքից զրկելու՝ շատերի համար վտանգավոր եղանակով և խուլիգանական դրդումներով սպանության փորձ. «Այստեղ սպանության փորձի մասին բացարձակապես խոսք չի կարող գնալ, վնասվածքները գոտկատեղից ներքև են, առաջադրված մեղադրանքներն անհիմն են»,- ասել է հանցագործի փաստաբանը:
Փաստաբանը համաձայն չէ մեղադրանքին նաեւ խուլիգանական դրդումների մասով. «Հանրային վայրում կրակոցներ արձակելը դեռ խուլիգանություն չէ»։ Երեմ Սարգսյանը նկատել է նաև՝ մեղադրյալի հետ խոսել է, բայց մանրամասներ այս պահին ներկայացնել չի կարող. «Այն, որ որևէ մեկը ինքնակամ է ներկայացել, չի նշանակում՝ մեղքը ընդունել է»,- մանրամասնել է Երեմ Սարգսյանը:
Փաստաբանի տեղեկություններով՝ 5 տուժածերից մեկը հստակ բողոք չի ներկայացրել, խոսքը վերաբերում է պատահական անցորդներից մեկին, բայց Երեմ Սարգսյանը չբողոքող տուժողի անունը չի հրապարակել: Դեռևս հայտնի չէ՝ մնացած տուժողները բողոք ներկայացրե՞լ են, թե՞ ոչ:
Երեմ Սարգսյանը նաև չի պարազաբանել՝ Գոռ Առաքելյանը դեպքի վայրում մենա՞կ է եղել, թե՞ նախագահականում աշխատող եղբոր հետ: Չի բացառվում, որ տուժածներից երկուսը ևս գործում որպես մեղադրյալ առաջադրվեն: Դատարանի առջև, մինչև մեղավորին քրեակատարողական հիմնարկ տեղափոխելը, հավաքված են եղել Յուվեցի Կարոյի ՝ Կարո Կարապետյանի և մեղադրյալ Գոռ Առաքելյանի հարազատները: