ԼՂ հակամարտությունում ԵՄ-ն վստահության եղանակ է փորձում ստեղծել, սակայն քաղաքական կամք է անհրաժեշտ հակամարտության կայուն կարգավորման համար: Այսօր այս մասին «Եվրոպական միության ընդլայնման 10-րդ տարեդարձը» խորագիրը կրող՝ ԵՄ-ի կողմից կազմակերպված քննարկման ժամանակ ասաց Հայաստանում ԵՄ պատվիրակության ղեկավար Տրայան Հրիսթեան՝ պատասխանելով միջոցառման ներկաների հարցերին:
Անդրադառնալով ԼՂ հակամարտության կարգավորման հարցում ԵՄ ներդրած ջանքերին՝ ասաց, որ ԵՄ-ն միշտ իր ջանքերն է ներդրել՝ փորձելով անդրադառնալ հարցին այնպես, որ վստահություն ստեղծի, նպաստեն հակամարտության գոյություն ունեցող ձևաչափով կարգավորմանը: Ըստ նրա՝ ԵԱՀԿ Մինսկի խմբի համանախագահները ջանքեր են գործադրում, ուստի հակամարտությունը ինչ-որ կերպ պետք է այս շրջանակներում լուծում ստանա: «ԵՄ-ն ներդնում է վստահության եղանակ ստեղծելու համար, քաղաքական կամք է պետք, որպեսզի կարողանանք կայուն լուծում տալ հակամարտությանը»,- նշեց նա:
Խոսելով ԱլԳ քաղաքականության շուրջ՝ դեսպանն ասաց, որ շատ քննարկումներ կան, քննադատություններ ԱլԳ քաղաքականության հասցեին, սակայն մեկ բան կարելի է վստահ ասել, որ մարդիկ փորձում են դասեր քաղել այդ քաղաքականությունից: Նրա կարծիքով՝ սա արվում է ծրագիրն ուժեղացնելու համար: «Մենք ունենք փաթեթ, որը հաստատեցին բոլոր անդամ երկրները: 27-28 էջանոց ծրագիր է, մենյու է, թե ինչպես կարող է ԵՄ-ն ԱլԳ գործընկերների հետ շարունակել երկխոսությունը, որը մեզ ավելի կմոտեցնի:
Սա նախագիծ է, որտեղ մենք կարող ենք դասեր քաղել, վերածել լուրջ նվաճումների, որովհետև հուսով ենք, որ Ռիգայի գագաթնաժողովին կզեկուցենք հաջողությունների մասին»,- ասաց նա: