«Հայկական Ժամանակ» օրաթերթը գրում է. «Երեկ Աժ-ն սկսեց Հովիկ Աբրահամյանի կառավարության գործունեության ծրագրի քննարկումը։ Ծրագիրը ներկայացնելու համար, ինչպես և նախատեսված է Աժ կանոնակարգ օրենքով, ամբիոնում հայտնվեց վարչապետ Հովիկ Աբրահամյանը, ով մոտ 20 րոպեանոց ելույթից հետո սկսեց պատասխանել պատգամավորների հարցերին ու միանգամից արեց աղմկոտ հայտարարություն։
Նա տեղեկացրեց, որ մայիսի 17-ին Հյուսիսային Կովկասում տեղի ունեցած սողանքի պատճառով Ռուսաստանից Հայաստան բնական գազի մատակարարումը դադարեցվել է. և որ վթարից հետո Հայաստանը բնական գազի կարիքները հոգում է Իրանից գազ ներմուծելով. «Արդեն չորրորդ օրն է, մենք գազ չենք ստանում Ռուսաստանից և Իրանից բնական գազի օրական ներմուծումները հասցրել ենք 2 միլիոն խորանարդ մետրի, և այդ մասով ես լուրջ տրամադրված եմ և շատ եմ կարևորում Իրանի հետ մեր համագործակցությունը»,– պատգամավոր Ալեքսանդր Արզումանյանի հարցին պատասխանելիս ասաց Հովիկ Աբրահամյանը։
Սա, ըստ էության, շրջադարձային հայտարարություն է. Աբրահամյանը քիչ չի հայտարարում, որ ներքին կարիքների համար Իրանից գազ է ներմուծվում Հայաստան, դեռ մի բան էլ ասում է, որ այս հարցում վճռական է տրամադրված Իրանի հետ հարաբերությունները խորացնելու համար։
Երեկ ստեղծված վիճակի մասին մեր թղթակիցը հետևյալ հարցն է ուղղել «Գազպրոմ Արմենիայի» մամուլի հետ կապերի պատասխանատու Շուշան Սարդարյանին. «Ռուսաստան-Հայաստան գազատարի վնասման պատճառով ՌԴ-ից Հայաստան գազ չի մատակարարվում։ Ինչպե՞ս է բավարարվում գազի նկատմամբ հայաստանյան սպառողների պահանջարկը, որքանո՞վ է այն լրացվում գազապահեստարանների և որքանով Իրանից ստացվող գազի հաշվին»։
Շուշան Սարդարյանը տվել է հետևյալ պատասխանը. «Ներկայումս Հայաստանում գազի սպառումը կազմում է օրական մոտավորապես 3 միլիոն խորանարդ մետր։ Իրանից ստացվող գազը ուղղվում է Երևանի ՋԷԿ՝ պայմանագրային պարտավորություններին համապատասխան չափաքանակներով։ Իսկ այլ սպառողներին անհրաժեշտ գազը մատակարարվում է գազապահեստարաններում կուտակված գազի հաշվին։ Գազատարի վնասումը որևէ կերպ չի անդրադարձել սպառողներին մատակարարվող գազի ծավալների վրա և գազի նկատմամբ պահանջարկը բավարարվում է ամբողջ ծավալով»։
Ինչպես նկատում եք, այս պատասխանը հերքում է Հովիկ Աբրահամյանի ասածը, և իրավիճակը դեռ պարզաբանման կարիք ունի»,–գրում է թերթը։
Մանրամասները՝ թերթի այսօրվա համարում։
