«Հարսնաքարի» գործով դատապարտվածների հարազատներն այսօր բողոքի ակցիա էին անցկացնում նախագահական նստավայրի դիմաց՝ պահանջելով արդար դատավճիռ:
Հարազատները բողոքում էին այն բանից, որ բոլոր ամբաստանյալներին դատարանը տվել է հավասար պատժաչափ՝ 12 տարվա ազատազրկում, այնինչ կատարվածի մեջ մեղավորության չափաբաժինն ամեն դատապարտյալի դեպքում՝ ըստ նրանց տարբեր է:
Ռազմական բժիշկ Վահե Ավետյանին դիտավորությամբ սպանելու մեղադրանքով դատապարտվածների հարազատներն անգամ նամակ են հղել հանրապետության նախագահ Սերժ Սարգսյանին, սակայն իրենց նամակն այդպես էլ անպաստասխան է մնացել:
Դատապարտվածներից Արման Բաղդասարյանի կինը՝ Աստղիկ Մանուկյանը, մեզ հետ զրույցում ասաց, որ իր ամուսինն առհասարակ այդ միջադեպին մասնակցություն չի ունեցել, տանն է եղել, երբ զանգահարել ու ասել են՝ նման միջադեպ է եղել․«Ոնց որ ես ու Դուք այստեղ կռիվ անենք, մի երրորդ մարդու 12 տարի ազատազրկեն, սա՞ է արդարությունը»,- ասաց Ա․Մանուկյանը, որի երեխան շաքարային դիաբետով հիվանդ է:
Դատապարտվածներից Գարիկ Մանուկյանի մայրը՝ Նունե Մարգարյանը, ում մեղադրում են դատավճիռը հրապարակելու օրը դատարանի նկատմամբ անհարգալից վերաբեմունք ցուցաբերելու մեջ, «Առաջին լրատվական»-֊ին ասաց, որ իր տղան Վահե Ավետյանին չի ծեծել: Նունե Սարգսյանը չի հայտարարում, թե իր որդին բացարձակապես անմեղ է: Նրա պնդմամբ՝ Վահե Ավետյանի հետ եկածներից մեկը հայհոյել է իր որդուն, ինչից հետո իր որդին հարվածել է նրան և ոչ մահացու կերպով ծեծել ռազմական բժիշկ Վահե Ավետյանին․ «Էլ ո՞նց ասեմ, եթե իմ տղան Վահե Ավետյանին ծեծել է, թող գնա նրա կողքը պառկի»։
Մանրամասները՝ մեր տեսանյութում