«ԱրմենՏել» ընկերությունը նշում է Հայաստանում «Վիմպել Կոմ»-ի 6-րդ տարեդարձը: Ինչպես այսօր ասուլիսի ժամանակ հայտնեց ընկերության գլխավոր տնօրեն Իգոր Կլիմկոն, մտնելով հայաստանյան շուկա և «հրաժարվելով մենաշնորհներից»` «ԱրմենՏել»-ը «խթան հանդիսացավ հեռահաղորդակցության ոլորտի զարգացման և կատարելագործման համար», և «Հայաստանը հետամնաց երկրների շարքից դուրս եկավ և մտավ զարգացող երկրների շարք»:
Անցած 6 տարում «Վիմպել Կոմ» ընկերությունների խմբի կողմից ՀՀ-ում մինչ օրս իրականացված ուղիղ ներդրումները կազմում են 327 մլն դրամ, բյուջե վճարված հարկերը գերազանցում են 97 մլրդ դրամը, որից ավելի քան 53 մլրդ դրամ վճարվել է 2009-2012թթ.: Ընկերության բջջային ծածկույթը 2006թ. 88.8%-ից 2012թ. ընդլայնվել է և դարձել 99.9%, ֆիքսված հեռախոսացանցի թվայնացումը ՀՀ տարածքում 48%-ից հասցվել է 82%-ի, Երևանում՝ 50%-ից 100%-ի, բաժանորդային ցանցի մալուխների ընդհանուր երկարությունը գերազանցում է 13 հազար կմ-ն: Ինտերնետ ծառայությունների ոլորտում Hi-Line-ի ներդրումը Կլիմկոն անվանեց «թվային հեղափոխություն», որից ներկայում օգտվում է 150 հազար ընտանիք, իսկ ինտերնետ տրաֆիկի սպառումը չափվում է հազարավոր տերաբայթերով:
Ի. Կլիմկոյի խոսքով` «ԱրմենՏել»-ը սկսում է ներդրումային երրորդ փուլը՝ բջջային և ֆիքսված կապի բաժանորդների սպասարկման որակի համակարգի բարելավման ուղղությամբ: Սակայն թե որքան ներդրումներ կարվեն` Կլիմկոն դժվարացավ պատասխանել՝ նշելով, որ ներկայում կատարվում են հաշվարկներ, և դրանց ամփոփումից հետո պարզ կլինի: Ընկերությունը մտադիր է ավելացնել բջջային կապի բաժանորդներին սպասարկող գրասենյակների թիվը, իսկ օրվա ծանրաբեռնված ժամերին՝ աշխատակիցների թիվը:
Թե ինչ նոր ծրագրեր կամ ծառայություններ է առաջարկելու «ԱրմենՏել»-ը բաժանորդներին, Կլիմկոն գաղտնի պահեց. «Չեմ կարծում, որ մեր մրցակիցների առումով ճիշտ կլինի խաղաքարտերը նախօրոք բացել: Կարող եմ միայն ասել՝ սպասեք անակնկալների»:
Կլիմկոն նաև նշեց, որ անցած տարիների ընթացքում «ԱրմենՏել»-ը տրամադրել է ավելի քան 1,1 մլրդ դրամ` կորպորատիվ սոցիալական պատասխանատվության ոլորտում իրականացնելով ավելի քան 130 ծրագիր՝ ուղղված կրթության, առողջապահության, սպորտի, երիտասարդների մշակութային և հայրենասիրական դաստիարակման ոլորտներին:
Լուսանկարը՝ PanARMENIAN Photo-ի
