Ռուս-չինական համաձայնության մեջ գազի սպասվող արժեքը կկազմի 360 դոլար 1 000 խմ-ի դիմաց, գրում է չինական Shanghai Daily թերթը: Սակայն այս գինը հնարավոր է միայն հանքերի համատեղ մշակմանը Չինաստանի ազգային նավթագազային կորպորացիայի (CNPC) հասանելիության պայմանով:
Չինաստանն ու Ռուսաստանը չեն կարողանում պայմանավորվել գազի գնի հարցում արդեն մի քանի տարի: Խոսքը տարեկան 68 մլրդ խմ գազ մատակարարելու մասին է: Սկզբում «Գազպրոմն» ուզում էր Չինաստանի համար սահմանել եվրոպականին հավասար գին, այսինքն՝ մոտ 400 դոլար 1 000 խմ-ի դիմաց, բայց չինացիները չէին համաձայնում սրան:
2014 թվականի սկզբում տեղեկություն կար, որ «Գազպրոմը» կարող է նվազեցնել գինը Չինաստանի համար՝ «մի քանի մլրդ դոլար» կանխավճարի դիմաց: Աղբյուրների տվյալներով՝ ռուսական մոնոպոլիան հույս ունի Չինաստանի հետ պայմանավորվել 358-393 դոլարով 1 000 խմ-ի դիմաց:
Մայիսի 20-21-ը ՌԴ նախագահ Վլադիմիր Պուտինը երկօրյա այցով կլինի Չինաստանում, նաև կմասնակցի Ասիայում համագործակցության և վստահության միջոցառումների վերաբերյալ խորհրդակցությանը: Նախատեսվում է մի քանի տասնյակ փաստաթղթերի փաթեթ ստորագրել: Սպասվում է նաև, որ կողմերը վերջապես գազային համաձայնագիր կստորագրեն, որի հարցով բանակցությունները Ռուսաստանի և Չինաստանի միջև գների տարբերության պատճառով ընթանում են արդեն ավելի քան 10 տարի:
