Սիրիան հավակնում է դառնալ նոր Սոմալի՝ երկիր, որտեղ չկա պետական իշխանություն, և որտեղ մշտապես քաղաքացիական պատերազմ է «Ալ-Քաիդա»-ի հետ կապեր ունեցող զինյալների և դաշտային հրամանատարների հետ:
«Ալ-Հայաթ» թերթի հետ հարցազրույցում նման կարծիք է հայտնել Սիրիայի հարցով ՄԱԿ-ի և ԱՊԼ-ի հատուկ բանագնաց Լախդար Բրահիմին:
«Իրավիճակը Սիրիայում շատ վտանգավոր է: Ես կարծում են, որ ճգնաժամի չլուծվելու դեպքում առաջ կգա «սոմալիզացիայի» սպառնալիք: Դա կնշաակի պետության փլուզում, դաշտային հրամանատարների և զինված միավորումների ուժեղացում»,- հայտնել է Բրահիմին:
Կենտրոնական պետական իշխանությունը Սոմալիում գործնականում բացակայում է 1991 թվականից՝ բռնապետ Սիադ Բարեի ռեժիմի տապալումից հետո: Երկրի կառավարությունը վերահսկում է միայն մայրաքաղաքը, իսկ տարածաշրջանները կառավարվում են սեփական վարչակազմերով:
Արդեն 2 տասնամյակ է՝ Սոմալիում չեն դադարում խմբավորումների միջև զինված ընդհարումները: Երկրում տեղակայված՝ Աֆրիկյան միության խաղաղարար ուժերը պայքար են մղում «Ալ-Քաիդա»-ի հետ կապեր ունեցող «Ալ-Շաբաբ» իսլամիստական կազմակերպության հետ:
