Վրաստանի պատիժների իրականացման դեպարտամենտի նախկին ղեկավար, պաշտպանության և ներքին գործերի նախկին նախարար Բաչո Ախալայան ձերբակալվել է հանրապետության գլխավոր դատախազությունում հարցաքննությունից հետո: Այս մասին այսօր հայտնել է Новости-Грузия գործակալությունը:
«Բաչո Ախալայային պաշտոնի չարաշահման մեղադրանք է ներկայացվել»,- նախկին նախարարի փաստաբան Դավիթ Դեկանոիձեի խոսքն է մեջբերում գործակալությունը:
Նրա տվյալներով` Ախալայան արդեն լքել է դատախազության շենքը: Ուր են նրան տեղափոխել` փաստաբանը չի ճշտել:
Սեպտեմբերի 20-ին պաշտոնը լքած Ախալայան Գլդանիի բանտում կտտանքների տեսանյութի հրապարակումից հետո կանչվել էր Վրաստանի գլխավոր դատախազություն հարցաքննության՝ որպես վկա ծառայողական պարտականությունների չարաշահման գործով: Նա ասել է, որ «պատրաստ է պատասխանել բոլոր հարցերին»:
2005-2008-ին Ախալայան եղել է դեպարտամենտի պատիժների իրականացման գծով ղեկավար, 2009-ի օգոստոսից 2012-ի հուլիս` պաշտպանության նախարար, հուլիսի 4-ից` ներքին գործերի նախարար: Սեպտեմբերի 20-ին Գլդանի բանտի տեսանյութերի հրապարակումից հետո զանգվածային ցույցերի մասնակիցների պահանջով հրաժարական է տվել: