«Կառավարության ծրագրի հետ կապված քննարկումները դեռևս ընթանում են ֆրակցիայում, դեռևս հարցուպատասխան կլինի, և նոր որոշում կկայացնենք, թե ինչպես քվեարկենք: Ինչպես տեսնում ենք կառավարության ծրագրի մեջ կան բազմաթիվ ընդհանրական ձևակերպումներ, բայց պետք է ավելի շատ մեխանիզմների մասին խոսքը լինի»,- պատասխանելով «Առաջին լրատվական»-ի հարցին, թե արդեն ընդդիմադիր ՕԵԿ-ն ինչպես է քվեարկելու կառավարության նոր ծրագրին՝ ասաց ՕԵԿ խմբակցության պատգամավոր Մհեր Շահգելդյանը: «Քվեարկության որոշումը կընդունվի քննարկումներից հետո»,- հավելեց նա:
Շահգելդյանն անդրադարձավ նաև կուտակայինի մասին օրենքին և դրա վերաբերյալ ՕԵԿ-ի ներկայացրած օրենսդրական նախաձեռնությանը, որը, սակայն, չընդունվեց: Այնուամենայնիվ, Շահգելդյանը ընդգծեց, որ ՕԵԿ մոտեցումն այնպիսին է, որ պարտադիր բաղադրիչը պետք է դուրս գա օրենքից: «Մեր կարծիքով՝ այդ նախաձեռնությունն ավելի հստակ և ճիշտ էր համապատասխանում այն մոտեցումներին, որոնք պետք է լինեին, բայց, ցավոք, այն չընդունվեց»:
«Առաջին լրատվական»-ը պատգամավորից հետաքրքրվեց՝ կարճ ժամանակում նույն կուտակայինի հետ կապված երկու տարբեր մոտեցումներն ինչո՞վ են պայմանավորված, և դա որքանո՞վ լուրջ կընկալվի հասարակության կողմից: Շահգելդյանի խոսքով՝ «իրավիճակ է փոխվել», և հետո՝ իրենց մոտեցման որոշակի փոփոխությունն ավելի շատ պայմանավորված է ոչ թե ընդդիմություն դառնալով, այլ Սահմանադրական դատարանի հայտնի որոշմամբ:
Անդրադառնալով ներքաղաքական հարցերին, մասնավորապես՝ քառյակի շրջանակներում ՕԵԿ-ի ներգրավվածությանը, Շահգելդյանն ասաց, որ քառյակը խորհրդարանական ուժերի միջև քննարկումների ֆորմատ է, դա կազմակերպություն չէ, և քառկայի մեջ ընդգրկվել-չընդգրկվելու խնդիր իրենք չեն դրել իրենց առաջ: «Աշխատանքային քննարկումներ բոլոր կուսակցությունների հետ եղել են, և մենք ասել ենք, որ եթե կլինեն նախաձեռնություններ, մոտեցումներ, որոնք կնպաստեն մեր երկրին, ժողովրդին, մենք պատրաստ ենք համագործակցել»,- ասաց Շահագելդյանը՝ ընդգծելով, որ նույն քառյակի շրջանակներում ևս հանդիպում է, որ տարբեր հարցերի շուրջ տարբեր մոտեցումներ են հնչում:
ՕԵԿ-ական պատգամավորը նշեց նաև, որ 6-7 հոգի հեռացվել են կուսակցությունից կուսակցության ընդդիմություն դառնալուց հետո պաշտոններում մնալու համար: Այս ցանկում, սակայն, ներառված չեն նախարարները:
Լուսանկարը՝ Armenpress-ի
