Պատերազմի և զինված հակամարտությունների ժամանակ շրջակա միջավայրի շահագործումը կանխելու միջազգային օրը, որը նշվում է նոյեմբերի 6-ին, ՄԱԿ-ի գլխավոր քատուղար Պան Գի Մունը հիշեցրել է, որ 1990-ից բնական ռեսուրսների համար պայքարի հողի վրա առնվազն 18 արյունոտ հակամարտություն է բռնկվել։ Այս մասին գրում է rosbalt.ru-ն:
Նա կոչ է արել վերջ տալ «հումքային անեծքին», որը սպառնում է անկայուն և հակամարտություն ապրած երկրների անվտանգությանը: Պան Գի Մունը մտավախություն է հայտնել, որ Աֆղանստանում, որտեղ վերջերս մոտ 1 տրլն դոլարի օգտակար հանածո է հայտնաբերվել, քաղաքացիական պատերազմն անվերջ կշարունակվի:
Բացի դրանից, նրա խոսքերով, Կոնգոյի Դեմոկրատական Հանրապետության արևելքում գտնվող անագի, տանտալի, վոլֆրամի և ոսկու հանքերն օգտագործվում են զինված խմբավորումների աջակցման համար և «սնում» են բռնությունը:
«Պատերազմն ու զինված հակամարտությունը քայքայում են կայուն զարգացման հիմքը: Դրանք հանգեցնում են աղքատության տարածմանը, սահմանափակում են գոյություն ունեցող հնարավորությունները և խախտում մարդու հիմնական իրավունքները»,- հայտարարել է Պան Գի Մունը:
