ԱԺ ՀՀԿ խմբակցության անդամ Հովհաննես Սահակյանից այսօր լրագրողները հետաքրքրվեցին, թե ինչու քրեակատարողական հիմնարկներում տեղի ունեցած վերջին դեպքերից հետո իշխող ՀՀԿ-ն չի պահանջում արդարադատության նախարար Հրայր Թովմասյանի հրաժարականը:
«Առնվազն պետք է կույր լինել` չտեսնելու և չգնահատելու համար այն առաջընթացը, որ արձանագրվեց Հրայր Թովմասյանի` նախարար դառնալուց հետո: Իհարկե, ոլորտում կան խնդիրներ, և Հրայր Թովմասյանը միակը չէ, որ պետք է վերացնի դրանք: Այդ խնդիրները լուծելու համար և ժամանակ, և կամք է պետք»,- պատասխանեց Հովհաննես Սահակյանը:
Քրեակատարողական հիմնարկների վերաբերյալ ԲՀԿ առաջնորդ Գագիկ Ծառուկյանի հայտարարությանն անդրադառնալով` Հովհաննես Սահակյանը նշեց, որ դրանում անսպասելի ոչինչ չկար` դա մտահոգ քաղաքական գործչի հայտարարություն էր:
