Այսօր Աժ տնտեսական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում կրքերը բորբոքվեցին: «Առաջինը Դուք սկսեցիք խախտել ռեգլամենտը, այս անգամ կարելի է, մյուս անգամ թույլ չեմ տալու»,- հայտարարեց նիստը վարող, տնտեսական հանձնաժողովի նախագահ Վարդան Այվազյանը՝ դիմելով պատգամավոր Հրանտ Բագրատյանն, որին չէին բավարարել էկոնոմիկայի նախարար Տիգրան Դավթյանի պատասխաններն իր հարցադրումներին:
– Ախպեր ջան, ասեք՝ ոնց անենք, անենք,- ասաց Հ. Բագրատյանը:
Վ. Ա. – Ախպեր ջան, 3 րոպե խոսում եք, 1 րոպե արձագանքում եք:
Հ. Բ. – Ես 2 րոպե 46 վայրկյան եմ խոսել…
Վ. Ա. – Հա, էդ ձեր ժամացույցով: Խնդրում եմ՝ ձեր ժամացույցը նորից ուղղեք:
Հ. Բ. – Դե, բերեք մի ժամացույց դնենք ու րոպե հաշվենք:
Վ. Ա. – Կարող եք՝ ժամացույցը դնեք ձեր դեմը, սա շոու չի: Հարց եք տալիս՝ տեղավորվեք Ձեր ժամանակի մեջ: Որպես հարգելի գործընկեր: Այ, էդ ձև եմ ես ձեզ ընդունում՝ առանց նովրուզ բայրամը մեջբերելու:
– Ես ձեզ լուրջ հարցեր եմ տալիս, չեք պատասխանում»,- հայտարարեց Բագրատյանը՝ դիմելով Տ. Դավթյանին:
Վերջինս կրկին փորձեց պատասխանել Բագրատյանի հարցադրումներին, օրինակ՝ խորհուրդ տալով զբոսաշրջության աճի մասին տեղեկանալ ազգային վիճակագրական ծառայության կայքից:
Ըստ Հ. Բագրատյանի՝ էկոնոմիկայի նախարարությունը փոշիացնում է զբոսաշրջության զարգացմանն ուղղված 50 մլն դրամը, բյուջեի նախագծում նշվում է, թե արդեն 2013 թ. ՏՏ ոլորտում առաջատար դիրքերի պետք է հասնենք, բայց IT ինդեքսով 109 տեղում ենք՝ 134 երկրների շարքում, երբ Վրաստանը՝ 98-րդ, Ադրբեջանը՝ 70-րդ տեղում են, նաև բարձր տեխնոլոգիաների արտահանման տեսակարար կշիռը արտահանման մեջ 2% է, ու կրկին վերջին տեղերում ենք. «Այդ մի քանի կոպեկը ծախսելով՝ ինչպե՞ս եք առաջատար դառնալու»:
Տ. Դավթյանը հավաստիացրեց, թե անիմաստ չէ այդ գումարները տրամադրելը, քանի որ ընկերութունները դրսում մասնակցում են ցուցահանդեսների, երկիրն են ներկայացնում. «Աշխարհում հարյուր-հազարավոր ռեյտինգներ կան, և շատ են շատացել»,- ցավով նշեց Դավթյանը՝ հավելելով, որ մարդիկ կարող են տաբեր ցուցանիշներ գտնել, ինչպիսին ցանկանան: Նա որպես օրինակ բերեց «Սինոփսիս Արմենիան», որի «շնորհիվ» ՀՀ-ն չիպ դիզայնի մասով առաջատար է աշխարհում, իսկ «Սինոփսիսը» ամերիկյան ընկերության խոշորագույն մասնաճյուղն է:
«IT ինդեքսն ավելի կարևոր է, քան Դուինգ բիզնեսը: Ինչո՞ւ ենք վկայակոչում ՀԲ-ին՝ ինչպես աղվեսը իր պոչին: Լավ իմաստով եմ ասում»,- նկատեց Բագրատյանը:
«Այսօր հանդիպում ունեմ ՀԲ-ի հետ, ինձ դժվար կլինի մեկնաբանել»,- պատասխանեց Տ. Դավթյանը: