«Սոցիոմետր» կենտրոնի տնօրեն, սոցիոլոգ Ահարոն Ադիբեկյանը, անդրադառնալով Րաֆֆի Հովհաննիսյանի այն հայտարարությանը, թե ինքը սրտացավ քաղաքացիներից գումար է ակնկալում նախագահական ընտրություններին առաջադրվելու համար, «Առաջին լրատվական»-ի հետ զրույցում ասաց. «Աքլորը, երբ վառեկի ետևից է ընկնում, ի՞նչ է մտածում. եթե չհասնեմ, գոնե կտաքանամ: Նույնն էլ` Րաֆֆին: Կամ` ԱՄՆ-ում այսօր 21 թեկնածու կա: Բնական է, որ բոլոր 21-ն ընտրվելու հույս չունեն: Իրենք ցանկանում են ճանաչում ձեռք բերել տվյալ նահանգում և այլ նմանատիպ բաներ: Մի խոսքով` նույնն էլ Րաֆֆի Հովհաննիսյանն է անում: Սրանք սովորական մանկական խաղեր են մեծահասակների համար»:
Սոցիոլոգի կանխատեսմամբ` եթե ընդդիմադիր դաշտից ուրիշ ոչ ոք չառաջադրվի, ապա Րաֆֆի Հովհաննիսյանը կհավաքի առավելագույնը 14 տոկոս ձայն, իսկ եթե առաջադրվի՝ 8-10 տոկոս. «Վերջնական տվյալները, այսինքն` թեկնածուների միջև վարկանիշային ռեսուրսները կբաժանվեն դեկտեմբերին, երբ հայտնի կլինեն թեկնածուների անունները»:
Ահարոն Ադիբեկյանը նշեց նաև, որ «Ժառանգություն» կուսակցության առաջնորդն այսօր վարվում է այնպես, ինչպես ժամանակին` Պարույր Հայրիկյանը. «Ես լավ եմ հիշում, երբ Հայրիկյանն էր առաջադրվում. մեր շենքը հավաքվեց՝ մոտ 40-50 ընտանիք, 5000-10000 տվեցինք, իրենք ցուցակագրում էին, մենք՝ ստորագրում:
Ինչ վերաբերում է Րաֆֆի Հովհաննիսյանին, ապա օրենքով չի արգելվում գումար հավաքել: Ամբողջ աշխարհում քաղաքացիները թեկնածուներին տալիս են գումար: Օրենքը արգելում է ընկերություններին ֆինանսական աջակցություն ցուցաբերել. յուրաքանչյուր քաղաքացի պետք է իր գրպանից գումար հատկացնի: Աշխարհում ընդունված է ճաշկերույթ անել, հանդիպել նախագահի թեկնածուի հետ և կողմնորոշվել: ԱՄՆ-ում, օրինակ, մի ճաշկերույթին հավաքվել էր մի քանի հազար մարդ, և մի քանի միլիոն գումար էր հավաքվել: Օբաման ռեկորդ խփեց՝ մեկ միլիարդին մոտ գումար հավաքեց:
Մեզ մոտ կուսակցության ակտիվիստները, կարկառուն դեմքերը իրենց միջոցներով ստեղծում են նախընտրական ֆոնդ և փակում են իրենց թեկնածուի ծախսերը: Քանի որ Րաֆֆի Հովհաննիսյանը դրսից չի կարող գումար ստանալ (մեր օրենքը դա արգելում է), ուրեմն պետք է հույսը դնի ներքին միջոցների վրա: Նա չի կարող ընկերություններին դիմել, այդ պատճառով էլ հույսն այսօր դրել է քաղաքացիների վրա»,-եզրափակեց Ա. Ադիբեկյանը:
