«Փետրվարի 18-ին հայ ժողովուրդը պարտավոր է ունենալ ազատ, արդար ընտրություններով ընտրված նախագահ: Ես հավատացած եմ, որ մեր հանրապետությունը, որ վերջերս բոլորեց իր 21-րդ տարեդարձը, պետք է դառնա տարածաշրջանում գործոն, եթե հաղթի իր ձայնի իրավունքը»,- «Կենտրոն» հեռուստաընկերության «Ուրվագիծ» հաղորդման եթերում հայտարարել է «Ժառանգություն» կուսակցության առաջնորդ Րաֆֆի Հովհաննիսյանը:
Նրա խոսքերով՝ վերջին ընտրությունները չանցան արդար, ընտրակաշառք բաժանվեց 100-ավոր միլիոն դոլարներով, ադմինիստրատիվ ռեսուրսը չարաշահվեց՝ դպրոցներ, հիվանդանոցներ, զինվորներ: Իսկ եթե այս ամենը չլիներ, ըստ նրա, «Ժառանգությունը» կունենար 15-20 տոկոս ձայն և հազիվ չէր անցնի 5 տոկոսի շեմը:
«Մենք պետք է դուրս գանք անտարբերությունից: Քաղաքացիական հոսանքները, հանրությունը և ժողովուրդը պետք է կարողանան ստեղծել այլընտրանք, որը կբերի իշխանության փոխանցման ընտրությունների միջոցով: Ճշմարտությունից բարձր ոչինչ չկա, ես ճշմարտությունը նախընտրում եմ կեղծիքից և ստից, քաղաքական դաշտը անբարոյական չպետք է լինի, պետք է այն ազատենք կեղծիքից»,- ասել է Րաֆֆի Հովհաննիսյանը:
Նա նաև ասել է, որ առաջարկում է այլընտրանք, և որքանով էլ այն անձնավորված լինի իր անունով, այդուհանդերձ, միայնակ ոչնչի չի կարող հասնել: «Մեր ժողովուրդն ունակ է քաղաքացիական մեծ ժայթքումների»,- ասել է Րաֆֆի Հովհաննիսյանը:
Ինչ վերաբերում է կոռուպցիայի դեմ պայքարին, «Ժառանգության» ղեկավարը դա համարել է մակերեսային և ձևական բան՝ նախընտրական մակարդակով: Նա կարծում է, որ պետք է վերահսկել բոլորին՝ բռնվողից մինչև բռնող. «Ակնհայտ է, որ օրենքի կիրառման համահավասարություն գոյություն չունի»:
