Հյուսիսատլանտյան դաշինքը մտադիր է առաջիկայում մեծացնել իր ներգրավվածությունը Հարավային Կովկասում, և այդ առումով, թե´ ՆԱՏՕ-ում, թե´ պաշտոնական Երևանի մոտ պատրաստակամություն կա խորացնել երկկողմ հարաբերությունները: Երկուշաբթի օրը «Ազատություն» ռադիոկայանի հետ զրույցում նման հայտարարություն է արել Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ բանագնաց Ջեյմս Ափաթուրայը:
«[Այժմ] մենք քննարկում ենք, թե ինչպես կարող է ՆԱՏՕ-ն մեծացնել իր ներգրավվածությունը [Հարավային Կովկասում]: Սակայն չենք ցանկանում, այսպես ասած, պարտադրել մեր [ներկայությունը], մենք ուղղակի ձգտում ենք ավելի լայն հնարավորություններ առաջարկել համագործակցության համար: [Ի դեպ], Հայաստանը, Վրաստանն ու Ադրբեջանը ցանկանում են օգտվել այդ հնարավորություններից և առաջիկա ամիսներին ավելի շատ բան կունենան իրենց առաջարկվող մենյուում», – ասել է Ափաթուրայը, որը Երևանում միջազգային համաժողովի է մասնակցում։
«Այսօր [ՆԱՏՕ – Հայաստան] համագործակցությունը կարող եմ լավ գնահատել», – շարունակել է ՆԱՏՕ-ի գլխավոր քարտուղարի հատուկ ներկայացուցիչը:
«Թույլ տվեք սկսել Աֆղանստանում իրականացվող առաքելությունից, ուր Հայաստանը եռապատկեց իր մասնակցության [ծավալները]: Կարող եմ նշել Կոսովոյում իրականացվող առաքելության մասին, ուր Հայաստանը վերադարձավ… Այս առումով շատ լավ է ամեն ինչ ընթանում», – ասել է Ափաթուրայը` հավելելով.- «Միևնույն ժամանակ, նշեմ, որ ՆԱՏՕ-ն աջակցություն է ցուցաբերում Հայաստանում ընթացող պաշտպանական բարեփոխումներին, ինչը շատ կարևոր է մեզ համար, և [մեր նպատակն է] օգնել Հայաստանին [իր զինված ուժերը] հնարավորինս համապատասխանեցնել ՆԱՏՕ-ական չափանիշներին»:
«Կարո՞ղ ենք ավելի անել երկկողմ հարաբերությորւններում` այո´: Մենք կողջունենք 2014 թվականից հետո Հայաստանի մասնակցությունը աֆղանական առաքելությանը: Մենք կցանկանայինք նաև ավելին անել Հայաստանում ընթացող պաշտպանական բարեփոխումների համար: Ուստի, շատ բան կա անելու, և այդ ամենը լավ հիմքի վրա է արվելու», – հայտարարել է Հյուսիսատլանտյան դաշինքի բարձրաստիճան պաշտոնյան։
