2013թ. բյուջեի նախագծով արտաքին գործերի ոլորտին նախատեսվում է հատկացնել 10 մլրդ 557 մլն դրամ, որը 1 մլրդ 420 մլն դրամով ավելի է այս տարվանից: Ինչպես այսօր ԱԺ մշտական հանձնաժողովների համատեղ նիստում ներկայացրեց ֆինանսների փոխնախարար Պավել Սաֆարյանը, առևտրային ձեռնարկությունների պահպանումը արտերկրում անցել է էկոնոմիկայի նախարարության ենթակայության տակ:
Պ. Սաֆարյանի խոսքով՝ 165,2 մլն դրամն ավելացել է` կապված Եվրախորհրդում ՀՀ նախագահության հետ, քանի որ 4 նիստ է անցկացվելու, և ՀՀ-ն պետք է հոգա դրանց ծախսը:
ՀՀ-ն նոր դեսպանություններ է բացելու Ինդոնեզիայում, Մեքսիկայում և Վիետնամում, որի համար բյուջեից կհատկացվի 436 մլն դրամ: Պետական արարողակարգի ծախսերն առանձնապես չեն փոխվում:
Միջազգային կառույցների հանդեպ ՀՀ պարտավորությունները 2013թ. հունվարի 1-ի դրությամբ կլինեն 6,1 մլն դոլար, իսկ 2014թ. հունվարի 1-ի դրությամբ՝ 5,4 մլն դրամ: «Երկու-երեք տարի հետո պարտք չենք ունենալու միջազգային կազմակերպություններին: Կար ժամանակ, որ այդ պարտքի չափը 23-24 մլն դոլար էր»,- նկատեց Պ. Սաֆարյանը: