Իրանական Press TV հեռուստաալիքի փոխանցմամբ՝ Իրանն առաջարկում է «Վեցյակի» հետ տարվող «միջուկային» բանակցությունները հեռարձակել ուղիղ եթերում, որպեսզի դրանք տեսանելի լինեն ամբողջ աշխարհում: Այս մասին հայտարարել է Իրանի ԱԳՆ-ի պաշտոնական ներկայացուցիչ Ռամին Մեհմանպարաստը:
Վերջինիս խոսքերով՝ տվյալ հարցում Իրանի դիրքորոշումը մնում է թափանցիկ և իրավական տեսանկյունից հիմնավորված. «Իրանն ուղղումներ է մտցրել իր առաջարկներում՝ իր միջուկային խնդրի կառուցողական լուծման նպատակով: Իրանի դեմ հնչեցված բոլոր մեղադանքները չունեն իրավական կամ տեխնիկական հիմք և առաջ են քաշվել քաղաքական դրդապատճառներով:
Իրանի վրա ճնշումներ են գործադրվում նրա միջուկային ծրագրի՝ իբրև թե ռազմական ուղղվածության պատճառով, սակայն դրա իրական նպատակը երկրի զարգացմանը խոչընդոտելու և ժամանակակից տեխնոլոգիաներից նրա օգտվելը սահմանափակելու ձգտումն է»: