Այսօր «Առավոտ» թերթը մի ուշագրավ տեղեկություն է հաղորդել, ըստ որի՝ «Արարատ» հեռուստաալիքի աշխատակիցների հետ վերջերս կայացած հանդիպման ժամանակ Վեհափառը, փորձելով արդարացնել եկեղեցու կողմից մշակութային հեռուստաալիքի «զավթումը», ասել է, որ ինքն անաչառ մարդ է։
«Ու որպես օրինակ էլ հիշեցրել, որ երբ ինքն ընտրվել է Ամենայն հայոց կաթողիկոս, եղբորն ազատել է Մայր աթոռի ճաշարանի տնօրենի պաշտոնից։ Ի դեպ, Վեհափառի մյուս եղբայրը ՌԴ և Նոր Նախիջևանի թեմի հոգևոր առաջնորդ տեր Եզրաս եպիսկոպոս Ներսիսյանն է»,- գրում է թերթը:
Մեր տեղեկություններով, ոչ թե Վեհափառ ընտրվելուց հետո է նրա եղբայրը ազատվել Մայր Աթոռի ճաշարանի տնօրենի պաշտոնից, այլ դրանից շատ առաջ` 1995 թ., Կաթողիկոսական տեղապահ Թորգոմ պատրիարքի որոշմամբ` ճաշարանում տեղ գտած չարաշահումների պատճառով։ Ավելին՝ նշենք, որ Վեհափառի եղբորը` Գևորգ Ներսիսյանին Մայր Աթոռում հիշում են որպես հարբեցողի, որը տարիներ առաջ տեղի ունեցած մի վրաերթի ժամանակ իր մտերիմ ընկերոջ մահվան պատճառ է դարձել, սակայն Վեհափառի անմիջական միջամտությամբ քրեական գործն այնպես են ձևակերպել, որ իբր մահացող ընկերն է եղել մեքենայի ղեկին։
Այդպես Գարեգին Վեհափառն իր եղբորը ազատել է քրեական պատասխանատվությունից։ Այսօր Գևորգ Ներսիսյանը Գարեգին կաթողիկոսի հայրենի գյուղի` Էջմիածնի Ոսկեհատ գյուղի գյուղապետն է` կրկին Վեհափառի «անաչառ» հովանավորությամբ։ Ահա այսպիսի կաթողիկոսական անաչառություն։
