ՀՀԿ-ն այսօր որևէ քաղաքական ուժի հետ պաշտոնների հարց չի քննարկում: «Առաջին լրատվական»-ի հարցին նման պատասխան տվեց ՀՀԿ փոխնախագահ Գալուստ Սահակյանը՝ հերքելով այն տեղեկությունները, թե ԲՀԿ ղեկավարին խոստացել են փոխվարչապետի պաշտոնը՝ պայմանով, որ նախագահական ընտրություններին ԲՀԿ-ն կսատարի ՀՀԿ թեկնածու Սերժ Սարգսյանին: «Որևէ պաշտոնի խնդիր այսօր չի քննարկվում, քանի դեռ կուսակցություններն իրենց խոսքը չեն ասել առաջիկա նախագահական ընտրությունների մասին: Կուլիսային, ոչ կուլիսային քննարկում էլ չկա, քաղաքականության մեջ ընտրությունների հետ կապված գործընթացները գաղտնիք չեն կարող լինել»,- ասաց նա:
Նշենք, որ այս փուլում քննարկվում է այն հարցը, որ նախատեսվում է սահմանադրական փոփոխությունների ճանապարհով մեկից ավելի փոխվարչապետի պաշտոն սահմանել, որպեսզի ԲՀԿ-ին փոխվարչապետի պաշտոն հատկացվի: ՀՀԿ անդամ, վարչապետ Տիգրան Սարգսյանը սա չէր բացառել՝ լրագրողների հարցին ի պատասխան նշելով, որ սահմանադրական փոփոխությունների հարցն իրենց օրակարգում կա:
Ի պատասխան այս հայտարարության` Գալուստ Սահակյանը նշեց. «Դա անձնական կարծիք է և ոչ թե պաշտոնական տեսակետ: Նման խնդիրներ այսօր չեն քննարկվում: Ցանկացած քաղաքական գործիչ նաև կանխատեսումներ է անում: Իսկ իրականությունն այս պահին այն է, որ ոչ Սահմանադրության խնդիրն է քննարկվում, ոչ էլ որևէ քաղաքական ուժի հետ համագործակցության: Կոնկրետ միայն ՀՀԿ-ն գնում է նախագահական ընտրություններին: Չեմ կարծում, որ առանց ռազմավարությունից խոսելու, որևէ քննարկում կարող է լինել քաղաքական ուժերի միջև, ընդ որում` նաև ՀՀԿ-ի և ԲՀԿ-ի միջև»,- ասաց նա: Միաժամանակ, Գալուստ Սահակյանը նշեց, որ ՀՀԿ-ի ու ԲՀԿ-ի միջև լարված պայքար չի եղել:
