Միացյալ Նահանգների ղեկավարության դիրքորոշումը սիրիական հակամարտության կարգավորման վերաբերյալ հակասում է հունիսին Ժնևյան պայմանավորվածությանը։ Այս մասին հայտարարել է ՌԴ ԱԳՆ ներկայացուցիչ Ալեքսանդր Լուկաշևիչը:
«ԱՄՆ-ը հայտարարում է, որ մտադիր չէ սպասել Ռուսաստանի և Չինաստանի դիրքորոշման փոփոխությանը, այսինքն առանց ակնարկների ասում են, որ Վաշինգտոնը սիրիական ճգնաժամի կարգավորման իրականացումը պատկերացնում է միայն իր պայմանների համաձայն»,- ասվում է հաղորդագրության մեջ:
«Միաժամանակ հայտարարվում է, որ ԱՄՆ-ը շարունակում է իր ջանքերը՝ սիրիական վարչակարգի վրա ճնշում գործադրելու համար: Սիրիական ընդդիմությանը «վտարանդի կառավարություն» ձևավորելու ուղիղ հրահանգներ են տրվում»,- հայտարարում է Լուկաշևիչը:
«Մոսկվան շարունակում է իր ջանքերը և կրկին կոչ է անում բոլոր արտաքին խաղացողներին անցնել ճանապարհի իրենց հատվածը և համոզել սիրիական ընդդիմությանը միավորվել կառավարության հետ երկխոսության հարթակում», -հայտարարում է ԱԳՆ-ն:
