Հանրահայտ երգչուհի Բրիթնի Սփիրսի ծնողները շահել են իրենց դստեր նախկին մենեջեր Սեմ Լատֆիի հետ ունեցած դատական վեճը: Լոս Անջելեսի Գերագույն դատարանը մերժել է Լատֆիի հայցի ուսումնասիրումը՝ հայտարարելով, որ նա իր հավակնությունների համար բավարար ապացույցներ չի ներկայացրել: Այս մասին հայտնում է Los Angeles Times-ը:
Երգչուհու նախկին մենեջերը Սփիրսի ծնողներին մեղադրել էր «համաձայնագրի պայմանների խախտման և զրպարտության մեջ», ինչպես նաև այն բանում, որ Բրիթնիի հայրը՝ Ջեյսմ Սփիրսը, նրա վրա 2008-ին ձեռք է բարձրացրել:
Հայցվորը նաև պնդել է, որ իրեն է պատկանում Բրիթնիի եկամուտների 15 տոկոսը, սակայն չի կարողացել ապացուցել այն կատարողի հետ ձեռք բերված որևէ համաձայնագրով:
Լատֆիին նաև դուր չի եկել այն, որ Բրիթնիի մայրը՝ Լին Սփիրսը, իր հուշագրություններում իրեն անվանել է «մանիպուլյացիայի վարպետ»: Նախկին մենեջերը նաև պահանջել է, որ ծնողները հերքեն իրենց հայտարարություններն այն մասին, թե ինքը թմրանյութեր է տալիս իրենց դստերը և փորձել է խոչընդոտել ծնողների հետ նրա շփմանը:
Սեմ Լատֆին TMZ.com-ին հայտարարել է վճռի բողոքարկման մտադրության մասին:
