«Դուք ոչ մեկի հետ չեք քննարկել, որ ուզում եք հուշարձանները տեղափոխել: Այն հուշարձանները, որոնց ասում եք՝ բեկոր, բեկոր չեն»,- այսօր ԱԺ մշտական հանձնաժողովների համատեղ նիստում 2013թ. բյուջեի քննարկումների ժամանակ հայտարարեց պատգամավոր Էդմոն Մարուքյանը՝ դիմելով մշակույթի նախարար Հասմիկ Պողոսյանին: Վերջինս ներկայացնում էր այս տարվա դեկտեմբերից Երևանի Պատմության թանգարանի Հանրապետության հրապարակին հարող տարածքում անցկացվելիք «Քարերը ժողովելու ժամանակը» խորագրով ցուցահանդեսի կազմակերպչական աշխատանքները: Ընդ որում՝ կառավարության որոշմամբ հուշարձանները Երևանում պետք է մնան մինչև 2016թ.:
Մարուքյանը նշեց, որ Դսեղի Սուրբ Գրիգոր եկեղեցուց բերված հուշարձանը տեսնելոււ համար բազմաթիվ զբոսաշրջիկներ էին գնում Դսեղ ու իջնում ձոր, իսկ հիմա այդ զբոսաշրջիկները չեն գնա մարզեր, այդ թվում` Դսեղ, այլ կգան Երևան:
Պատգամավորը հայտարարեց, որ երաշխիք չկա, թե չորս տարի անց հուշարձանները կվերադարձնեն, առավել ևս, որ նախարարն ասում է, թե դրանք չունեն իրենց տեղը, ընկած են, թաղված են հողում ու անուշադրության են մատնված:
Նիստը վարող Արտակ Դավթյանը թույլ չտվեց, որ Հ. Պողոսյանը պատասխանի պատգամավորին՝ նշելով, թե այդ հարցը Մարուքյանը հնչեցրել է հեռուստատեսությամբ և գրավոր պետք է դիմի կառավարությանն ու ստանա պատասխան:
Նախարար Հ. Պողոսյանը լրագրողների հետ ճեպազրույցում հայտարարեց, որ իրենց տեղերում հուշարձանները վերականգնել չեն կարող, և որ ցուցանմուշներն ավելի կկարևորվեն, եթե ցուցադրվեն Երևանում: Նրա խոսքով` յուրաքանչյուր մարզում կա շուրջ 4 հազար հուշարձան, և 1-2-ը Երևան բերելով` ոչինչ չի լինի, և զբոսաշրջիկների թիվն էլ մարզերում չի պակասի: «Դա չի նսեմացնելու որևէ բան, և մենք 4 տարի անց վերադարձնելու ենք դրանք»: