Նորզելանդական Air New Zealand ավիաընկերությունը օդանավը լցրել է «Մատանիների տիրակալի» հերոսներով՝ բացատրելով օդանավի սրահում անվտանգության կանոնները:
Ջոն Տոլկիենի գրքի էկրանավորում հանդիսացող «Հոբիթ» ֆիլմի ռեժիսորը որոշել է ֆիլմի թողարկումից առաջ «Մատանիների տիրակալը» ֆիլմի երկրպագուներին ուրախացնել սիրելի հերոսների մասնակցությամբ կարճ տեսանյութով: Փիթեր Ջեքսոնը նկարահանվել է ավիաթռիչքների անվտանգության մասին ավիաընկերության տեսահոլովակում: Սյուժեն բավականին պարզ է. բորտուղեկցորդները խոսում են այն մասին, ինչը ցանկացած ուղևոր լսում է թռիչքից առաջ:
The New Zealand Herald-ի փոխանցմամբ՝ անվտանգության ամրագոտիների, փրկարարական բաճկոնների և թթվածնային դիմակների մասին հրահանգները լսել են հոբիթները, թզուկները, օրկերն ու այլ արարածներ Տոլկիենի աշխարհից:
Նույնիսկ հրամանատար Գենֆալդը, հանուն հրդեհային անվտանգության, հրաժարվում է ծխամորճից: Իսկ հայտնի Գոլումը ցույց է տվել թե ինչպես գտնել վթարային ելքը մթության մեջ՝ կողմնորոշվելով հատակի և նստարանների լույսերով:
4 րոպեանոց հոլովակը ավիաընկերությունը կցուցադրի տեղական և միջազգային չվերթների ժամանակ:
Ջեքսոնը հոլովակում փոքր դրամատիկ դեր է խաղում: Նա իր նստարանի մոտ մատանի է գտնում, դնում մատին ու անհետանում:
Հոլովակը YouTube վիդեոհոսթինգում հայտնվելու առաջին իսկ օրը ավելի քան 450 հազար դիտում է ունեցել: Երրորդ օրն արդեն դիտումների քանակը հասել է 2 միլիոնի:
«Հոբիթի» պրեմիերան նշանակված է նոյեմբերի 28-ին:
