Մինչև 2014 թվականի ավարտը ամբողջ աշխարհում համացանցից օգտվողների թիվը կմոտենա 3 միլիարդի, որը երկրագնդի բնակչության մոտ 40 տոկոսն է: Համացանցին միացած լսարանի ավելի քան 1/3-ը բաժին է ընկնում զարգացող երկրներին: Այս մասին ասվում է ՄԱԿ-ին կից Էլեկտրակապի միջազգային միության զեկույցում՝ փոխանցում է The Telegraph-ը:
Ներկայումս համացանցի ամենամեծաթիվ «բնակչությունը» բաժին է ընկնում Ասիախաղաղօվկիանոսյան տարածաշրջանին: Զեկույցի տվյալներով՝ չմիացած են հիմնականում մնում զարգացող երկրների բնակիչները՝ մոտ 90 տոկոսը, և հենց նրանց հաշվին էլ կապահովվի աճը: Վերլուծաբանների կանխատեսումներով՝ մինչև տարեվերջ համացանց դուրս կգա աֆրիկյան մայրցամաքի բնակչության 1/5-րդ մասը:
Լայնաշերտ բջջային կապի բաժանորդների թիվը կհասնի 2,3 միլիարդի՝ ասվում է զեկույցում: Աճի առաջատարն այստեղ կրկին Աֆրիկան է. այն 2010 թվականի 2 տոկոսից 2014-ին հասել է 20 տոկոսի: Մինչև տարեվերջ բջջային հեռախոսներից կօգտվի 7 մլրդ մարդ, որի մեծ մասը՝ 75 տոկոսը, կլինեն զարգացող երկրներում: