ԵԱՀԿ Մինսկի խմբի ամերիկացի համանախագահ Ջեյմս Ուորլիքը այսօր Կարնեգի հիմնադրամում ելույթ է ունեցել և ներկայացրել Ղարաբաղի հակամարտության լուծման ԱՄՆ տարբերակը: Ըստ էության, տարբերակն ինքնին չի պարունակում առանձնապես նոր դրույթներ, քան այն, ինչ տարբեր մոդիֆիկացիաներով շոշափվել է վերջին տարիներին կարգավորման այս կամ այն ձևակերպման ներքո:
Այստեղ առաջին հերթին, իհարկե, ուշադրության է արժանի հրապարակման, այսինքն` Մինսկի խմբի ամերիկացի համանախագահի հայտարարության փաստն ինքնին, որովհետև մինչև այսօր ըստ էության կարծեք թե չի եղել նախադեպ, երբ ամերիկացի կամ ընդհանրապես որևէ համանախագահ ներկայացրել է կարգավորման իր պետության տարբերակը: Այսինքն` մինչև այսօր ներկայացվել են ընդհանուր առաջարկներ: Այսօր ԱՄՆ-ը ներկայացնում է իր առաջարկը, ինչը ըստ էության նշանակում է, որ Մինսկի խմբի մյուս համանախագահները ունեն այլ տարբերակներ և առաջարկներ: Եվ ըստ էության շատ հավանական է, որ առաջին հերթին Ռուսաստանի մասին է խոսքը:
Պատահական չէ, որ ԱՄՆ-ը ղարաբաղյան հակամարտության կարգավորման իր տարբերակով է հանդես գալիս հենց այժմ, երբ սրվել են հարաբերություններն Արևմուտքի և Ռուսաստանի միջև, ընդ որում` սրվել են ղրիմյան-ուրաինական զարգացումների, Ռուսաստանի այդ ուղղությամբ գործողությունների արդյունքում, որոնք այսօր ռեալ վտանգ և մտավախություններ են առաջացրել նաև ղարաբաղյան ուղղությամբ տարածվելու առումով: Ահա այս ֆոնին ԱՄՆ տեսակետի հրապարակումը Մինսկի խմբի համանախագահի առանձին ելույթով, իրականում կարծեք թե հուշում է այն մասին, որ Ռուսաստանն առաջարկում է կամ ձգտում է լուծման այլ տարբերակի:
Այս տեսանկյունից, ամերիկյան տարբերակին ծանոթանալուց հետո հարց է առաջանում, իսկ ինչպիսի՞ն են Մինսկի խմբի մյուս համանախագահների տարբերակները: Ըստ էության, Ուորլիքը կարծեք թե մյուս համանախագահներին մղում է կամ համաձայնելու ԱՄՆ տարբերակին, կամ իրենց տարբերակները հայտնելու՝ կամ ուղղակի, կամ ամերիկյան տարբերակին անհամաձայնություն հայտնելու անուղղակի ճանապարհով: Այսինքն` շատ հավանական է, որ ամերիկյան կողմն այսպիսով կատարում է մի քայլ, որը մյուս համանախագահներին և մասնավորապես Ռուսաստանին ստիպելու է բացահայտել իր` այսպես ասած գաղտնի պահվող մտադրությունները ղարաբաղյան հակամարտության կարգավորման մասով:
Չմոռանանք, որ ղրիմյան իրադարձություններից հետո ամերիկյան համանախագահը բազմաթիվ անգամներ մտահոգություններ է արտահայտել այն մասով, որ այդ լարվածությունը չպետք է ապակայունացմամբ սպառնա ղարաբաղյան տարածաշրջանում: Ամերիկյան կողմն ակնհայտորեն փորձեց նախապատրաստել հայ-ադրբեջանական նախագահական մակարդակի հանդիպում, ինչը սակայն չի ստացվում: Եվ ամենայն հավանականությամբ Ուորլիքի այս ելույթը և խաղաքարտերը որոշակիորեն բացելու քայլը նախագահական հանդիպման այլընտրանքն է, որով ամերիկյան կողմը ցանկանում է բացահայտել վտանգներն ու ըստ էության այդպիսով կանխել դրանք:
Լուսանկարը՝ PanARMENIAN Photo-ի
