Այսօր կառավարությունն ընդունել է նախագիծ, ըստ որի` հղիության արհեստական ընդհատումը մինչև 9 շաբաթական հղիության դեպքում կիրականացվի վիրահատական կամ դեղորայքային ճանապարհով, իսկ 9-12 շաբաթական հղիության դեպքում՝ միայն վիրահատական ճանապարհով:
Այս առիթով գինեկոլոգ Արմինե Կիրակոսյանն «Առաջին լրատվական»-ի հետ զրույցում նշեց, որ շատ վտանգավոր է նույնիսկ 3 շաբաթական հղիության դեպքում այն ընդհատել դեղորայքային ճանապարհով.
«Դեղորայքային միջոցով հղիության ընդհատման դեպքում կնոջ մոտ կարող է առաջանալ արյունահոսություն, և դա կարող է բերել ընդհուպ նրան, որ ստիպված լինենք հեռացնել կնոջ արգանդը: Բացի այդ, լինում են դեպքեր, երբ դեղորայքը չի օգնում, և պտուղը մնում է ֆիքսված: Այս պարագայում բավական վտանգավոր է, որովհետև նման դեղորայքներ ստացած օրգանիզմում պտուղը չի կարող լիարժեք լինել, և այդ երեխան հետագայում անպայման կծնվի թերություններով: Այն կանանց, ովքեր հղիության առաջին շաբաթների դեպքում ընդունել են այդօրինակ դեղամիջոցներ, սակայն պտուղը մնացել է, և կինը ի վերջո որոշել է ծննդաբերել, խորհուրդ է տրվում անպայաման վիրահատության միջոցով ընդհատել հղիությունը, որովհետև, բացի այն, որ երեխան կարող է ծնվել թերզարգացած և տարաբնույթ այլ խնդիրներով, նաև մոր մոտ կարող են առողջական խնդիրներ առաջանալ:
Մինչև 9 շաբաթական պտուղը դեռ ձևավորված, ֆիքսված չէ, այդ պատճառով էլ դեղորայքների միջոցով հնարավոր է ընդհատել հղիությունը, իսկ հետագա ամիսների ընթացքում՝ ոչ, բայց նորից եմ կրկնում՝ դեղորայքով ցանկալի չէ»,-եզրափակեց գինեկոլոգը:
