«Մեկ երեխայի» քաղաքականությունը Չինաստանի տնտեսությանը սպառնում է կոլապսով: Չինաստանը զգում է բնակչության սուր պակաս՝ նման հայտարարությամբ են հանդես եկել տեղի կառավարամետ China Development Research Foundation հետազոտական հիմնադրամի փորձագետները: Նրանք երկրի իշխանություններին կոչ են արել անհապաղ դադարեցնել ծնելիությունը սահմանափակող «Մեկ ընտանիք՝ մեկ երեխա» պետական ծրագրի իրագործումը: Այս մասին հայտարարում է Associated Press-ը:
Ժողովրդագիրները հաստատում են, որ ճգնաժամային իրադրության կարգավորման համար անհրաժեշտ է արդեն մինչև 2015 թվականը զույգերին թույլ տալ երկրորդ երեխա ունենալ:
Փորձագետները մտավախություն ունեն, որ իրենց պահանջներին ականջալուր չլինելու դեպքում Չինաստանը շուտով կարող է բախվել աշխատուժի անբավարարության և բնակչության ծերացման խնդրի: Նրանց կարծիքով՝ դա չի կարող չազդել երկրի տնտեսության վրա:
«Մեկ երեխայի» քաղաքականությունը Չինաստանում սկսել է գործել 1980 թվականից՝ բնակչության աճի կարգավորման նպատակով:
