Վերաքննիչ դատարանն այսօր` մայիսի 5-ին տեղի ունեցած նիստի ժամանակ որոշել է Գորիսի նախկին քաղաքապետ Սամվել Հարությունյանի` ընդդեմ Գլխավոր դատախազի և ՀՔԾ պետի ներկայացրած հայցով քննությունը շարունակել մայիսի 22-ին: «Առաջին լրատվական»-ի հետ զրույցում Հարությունյանը, որն առաջին անգամ ներկա է եղել դատավարությանը, նշեց, որ Վերաքննիչ քրեական դատարան բողոք է ներկայացրել, որ Կենտրոն և Նորք-Մարաշ վարչական շրջանների ընդհանուր իրավասության դատարանի կայացրած որոշումը վերացվի, դատարանը պարտավորեցնի, որ ՀՀ գլխավոր դատախազությունը և ՀՔԾ-ն քրեական գործ հարուցեն Սուրիկ Խաչատրյանի և նրա բանդայի հեղինակած բազմաթիվ փաստերի առնչությամբ ներկայացված դիմումների առնչությամբ:
«Ես ավելի քան մեկ ժամ հնարավորություն ստացա հիմնավորել ներկայացրածս վերաքննիչ բողոքը, բերեցի բազմաթիվ փաստարկներ, ապացուցեցի, որ ՀՀ Գլխավոր դատախազությունը և ՀՔԾ-ն Սուրիկ Խաչատրյանի հանցանքների նկատմամբ դրսևորել են հանցավոր անգործություն:
Ինձ համար ամենևին զարմանալի չէր, որ այս դատական նիստին նույնպես չէին բարեհաճել ներկայանալ ոչ միայն գլխավոր դատախազը, ՀՔԾ պետը, այլև նրանց որևէ ներկայացուցիչ: Այսօրվա նիստին նրանք նույնպես չէին ներկայացել` իբրև զբաղված էին, կարևոր գործերով էին զբաղված. էդ ինչքա՞ն էր կարևոր: Վերջապես, ես ձեզ դատի եմ տվել, Հայաստանում քանի՞ անգամ են Գլխավոր դատախազին և ՀՔԾ պետին դատի տալիս»,- ասաց նա` հավելելով, որ, վերջին հաշվով, փոխանակ օրինակ ծառայեն, հարգանք դրսևորեն դատարանի նկատմամբ, ուղղակիորեն ապացուցում են, որ թքած ունեն դատարանի վրա, իսկ դատարանները` ինչպես մինչ այսօր, այդպես էլ հետայսու, կատարելու են դակիչի դեր:
Հարությունյանի խոսքով` Գլխավոր դատախազությունն անգամ հարկ չի համարել գրավոր պատասխան ներկայացնել, առարկություններ: «Ես, ի վերջո, ներկայացրել եմ ոչնչացնող փաստ-ապացույցներ: Այս ամենից հետո նրանք ընդամենը գրել են, որ դրանք բավարար չեն, որպեսզի քրեական գործ հարուցվի:
Այնպես չէ, որ նրանք ասեն` ճիշտ չեք ասում, նրանք ասում են` բավարար չէ: Ինձ և իմ նմաններին կարող են դատի տալ, դատել պարզապես, ինչպես Սուրիկ Խաչատրյանը դատի է տվել ինձ, և գուցե դատարանը նաև բավարարի նրանց պահանջը, ո՞վ գիտե, ես չեմ զարմանա: Փոխանակ հանցագործին պատժեն՝ հանցագործի ու հանցագործության դեմ պայքարողին են այստեղ պատժում»,- ասաց նա:
Հարությունյանը նշեց, որ մինչ օրս անձամբ չէր ներկայանում, հավուր պատշաճի ներկայանում էր իր ներկայացուցիչը` Մուշեղ Շուշանյանը, իսկ այս դատական նիստերին ինքը ստիպված եղավ մասնակցել, որովհետև հրապարակավ պահանջել էր, որ գլխավոր դատախազը և ՀՔԾ պետը ներկայանան դատարան, կանգնեն դեմ դիմաց, հարցեր տան միմյանց:
«Կարող է` իմ մասին այլ կարծիք փորձեին ներկայացնել, միայն դրա համար ներկայացա: Դատավորը նպատակահարմար գտավ հաջորդ դատական նիստը նշանակել մայիսի 22-ին` 10:30-ին, որպեսզի նորից կապվի Գլխավոր դատախազության, ՀՔԾ ղեկավարների հետ, առաջարկի, որ նրանց ներկայացուցիչները նույնպես մասնակցեն դատավարությանը:
Ես շարունակելու եմ իմ պայքարը դատական առումով և ստիպված դիմելու եմ Վճռաբեկ դատարան, իսկ հարկ եղած դեպքում` ՄԻԵԴ»,- ասաց նա:
