Տնտեսական մրցակցության պաշտպանության պետական հանձնաժողովը հետևում է ցորենի և հացամթերքի շուկաների զարգացումներին: Այս մասին այսօր լրագրողներին ասաց հանձնաժողովի նախագահ Արտակ Շաբոյանը:
Հիշեցնենք, որ վերջին ամիսներին Հայաստանում նկատվում է հացամթերքի թանկացում: Ազգային վիճակագրական ծառայության տվյալներով՝ վերջին մեկ ամսվա ընթացքում դարձյալ արձանագրվել է հացամթերքի 1,2-4,1 տոկոսի գնաճ:
«Բարձր կենտրոնացվածության շուկա է` սոցիալական կարևոր նշանակություն ունեցող: Մենք ամեն օր մոնիտորինգ ենք իրականացնում և տեղական շուկայում, և ցորենի ներմուծման գներն ենք դիտարկում, հետևում ենք միջազգային շուկայի զարգացումներին: Գնային փոփոխությունները համահունչ են միջազգային շուկայի զարգացումներին. միջազգային շուկայում էլ անընդհատ տեղի են ունենում ցորենի գների բարձրացումներ»,- ասաց հանձնաժողովի նախագահը:
Ի պատասխան լրագրողի այն դիտարկմանը, որ մաքսային ծառայության տվյալներով` վերջին մեկ ամսվա ընթացքում Հայաստան ներմուծված ցորենի գինը գրեթե չի բարձրացել, Շաբոյանը ասաց. «Ես չեմ ուզում, որ մենք քննարկենք մաքսայինի տվյալները, եկեք քննարկենք մեր ուսումնասիրությունների տվյալները»:
ՏՄՊՊՀ նախագահը նշեց, որ իրենց ամենօրյա մոնիտորինգի արդյունքում միջազգային շուկայում ցորենի գների շարունակական բարձրացում է արձանագրվում:
«Ռուսաստանը սահմանափակումներ է կիրառում՝ հիմնականում կապված ցորենի բերքի նվազման հետ»,- նշեց նա՝ հավելելով, որ ուսումնասիրությունները շարունակվում են, հանձնաժողովը կշարունակի հետևել միջազգային շուկայի զարգացումներին: