Երեկ ԱՄՆ նախագահ Բարաք Օբաման այցելել է «Սենդի» արևադարձային փոթորկից տուժած արևելյան շրջաններ: Այսօր Herald Tribune-ը ներկայացրել է աղետի հետևանքների գնահատման նպատակով Օբամայի ուղղաթիռային շրջայցի ընթացքում կատարված նկարահանումները: Նյու Ջերսիի ափի երկայնքով երևում են ավազով ծածկված փողոցներ, հինահատակ ավերված տներ:
Նախագահական ընտրություններից 6 օր առաջ, Օբաման ուսումնասիրել է Նյու Ջերսիի բնակավայրերը, որտեղ տասնյակ հազարավոր տներ ջրի տակ են մնացել, 2 միլիոն ընտանիք շարունակում է մնալ առանց էլեկտրականության: Ափի որոշ հատվածների բնակավայրեր ամբողջովին ավերակների են վերածվել:
Ուղղաթիռով շրջայցից հետո, Օբաման այցելել է Ատլանտիկ սիթիից հյուսիս-արևելք ընկած Բրիգենտին կղզի քաղաք, որտեղ հանդիպել է բնակիչներին և այնտեղ ժամանակավորապես ապաստանածների, բնակիչների կողմից արժանացել գովասանքի խոսքերի՝ աղետի հետևանքների վերացման ուղղությամբ ջանքերի համար:
Այժմ մասնագետները հաշվում են փոթորկի հասցրած վնասները: Բարաք Օբաման կարծում է, որ ավերածությունների հետևանքով նյութական վնասը կարող է կազմել 20 մլրդ դոլար, դա լավագույն դեպքում: Տնտեսական վնասը գնահատվում է 10-30 մլրդ դոլար:
Վերականգնման ծախսերի հիմնական ծանրությունը կկրեն մասնավոր ապահովագրական ընկերությունները: Անցած տարի փոթորիկների հետևանքով նրանք 32 միլիարդ դոլարի վնաս են փոխհատուցել:
Փոթորկի պատճառով Նյու Յորքի տնտեսությունը ամեն օր կորցնում է 200 միլիոն դոլար: Շուրջ 29,2 մլն դոլար արդեն իսկ իշխանությունները ծախսել են անվտանգության հավելյալ միջոցառումների և փրկարարական օպերացիաների վրա: Փոթորկի հետևանքով մի քանի օր իրենց աշխատանքն են դադարեցրել օդանավակայանները, Նյույորքյան բորսան, Բրոդվեյի թատրոնները, ինչպես նաև հասարակական տրանսպորտը, ներառյալ մետրոպոլիտենը: Այս ամենը չէր կարող չազդել քաղաքի տնտեսության վրա:
