Հայ ազգային կոնգրեսի մաս կազմող ՍԴՀԿ անդամ, ԱԱԾ նախկին փոխնախարար Գուրգեն Եղիազարյանը «Ժողովուրդ»-ի հետ զրույցում նշեց, nr իր կարծիքով ՀԱԿ առաջնորդ Լևոն Տեր-Պետրոսյանը նախագահական ընտրություններում կառաջադրվի, քանի որ չի ցանկանա ժողովրդին նման վիճակում թողնել:
– Պարոն Եղիազարյան, այնպիսի տպավորություն է, որ ՀԱԿ-ում խառնաշփոթ է. տեսակետ հայտնողները հատուկենտ մարդիկ են, իսկ մյուսներին «հրահանգված» է առանց թույլտվության ոչինչ չխոսել:
– Ես նման բան չեմ կարող ասել, իսկ Դուք ինձ դասում եք խոսողների՞, թե՞ լռողների շարքին:
– Չլռողների:
– Այդ հարցին ես չեմ կարող պատասխանել:
– ՀԱԿ-ում կա՞ կոնկրետ պայմանավորվածություն, թե ով պետք է «խոսի»:
– Ո´չ, նման բան չկա, մենք ազատ ենք, ՀԱԿ-ը ամենաժողովրդավար կառույցներից մեկն է:
– Այժմ ՀԱԿ-ն ինչ գործունեությամբ է զբաղված: Բացի այն 5 պատգամավորներից, որոնք խորհրդարանում զբաղված են իրենց աշխատանքներով, ի՞նչ են անում մյուս ներկայացուցիչները:
– Մենք պատրաստվում ենք նախագահական ընտրություններին, ակտիվ քննարկումներ ենք կատարում, ծրագրեր մշակում: Ձեր նշած «մյուս թևը» ևս մեծ աշխատանքներ է կատարում և լուրջ աշխատանք:
– Նշեցիք, որ ՀԱԿ-ում ակտիվ քննարկումներ են: Ի վերջո, որոշվե՞լ է, թե ով է լինելու ՀԱԿ-ի թեկնածուն նախագահական ընտրությունների ժամանակ: ՀԱԿ առաջնորդ Լևոն Տեր-Պետրոսյանն իր թեկնածությունն առաջադրելո՞ւ է, թե՞ ոչ:
– Ես կարող եմ միայն իմ կարծիքն ասել, որ Լևոն Տեր-Պետրոսյանն իր թեկնածությունն առաջադրելու է նախագահական ընտրություններում:
– Այսինքն` այդ քննարկումներից եզրակացնում եք, որ Տեր-Պետրոսյանը նման մտադրությո ւն ունի:
– Չէ, ուղղակի ես Ձեզ կարող եմ միայն իմ կարծիքն ասել, որ նա ժողովրդին էս վիճակի մեջ չի թողնելու և իր թեկնածությունը կառաջադրի: Չեմ կարծում, որ ուրիշի «դեմքով» հանդես կգա:
– Ակնհայտ է, որ Փաշինյան-Զուրաբյան- Ջհանգիրյան-Բագրատյան քառյակում հակասություններ կան, իսկ նշվածներից յուրաքանչյուրը ՀԱԿ-ում իր համակիրներն ունի: Դուք ո՞ւմ կողմնակիցն եք:
– Ես Ձեր նշած հակասության մասին ոչինչ չեմ կարող ասել, թե կոնկրետ ինչ հակասություն կա, իմ կարծիքով` չկա: Մենք ընդհանուր գործ ենք անում:
– Ակնհայտ է, որ ՀԱԿ-ԲՀԿ «սիրավեպ» է սկսվել: Ըստ Ձեզ, այն կհանգեցնի՞ համագործակցության:
– Ցանկացած ուժի հետ մենք պատրաստ ենք համագործակցել, ի վերջո, մի փոքրիկ երկրում ենք ապրում, և չկա մի խնդիր, որը չհուզի ցանկացածիս: Բայց նշեմ, որ կհամագործակցենք այն ուժ հետ, որը պատրաստ է իշխանափոխության և մինչև վերջ կգնա դրան:
– ՀԱԿ-ի գրեթե բոլոր անդամները տարբեր ժամանակահատվածներում հայտարարում էին «ոչ դոդացմանը», այդ դեպքում ինչպե՞ս եք պատկերաց նում ՀԱԿ-ի համագործակցությունը ԲՀԿ-ի ու նրա առաջնորդ Գագիկ Ծառուկյանի հետ:
– Էս արևի տակ մշտական ոչ մի բան չկա, ու երեկվա թշնամիները կարող են դառնալ բարեկամներ, եթե, իհարկե, ունեն նույն նպատակը:
– Հիմա ԲՀԿ-ն նույն նպատա՞կն ունի, ինչ որ ՀԱԿ-ը:
– Ճիշտն ասած՝ ես դա չեմ կարող ասել: Ինձ համար դա մինչև վերջ պարզ չէ:
