Բրիտանացի սահմանապահները ձերբակալել են արևելաաֆրիկյան Էրիթրեա պետության երեք քաղաքացու, որոնք փորձել են ապօրինի կերպով հատել Մեծ Բրիտանիայի սահմանը՝ թաքնվելով հուղարկավորման գործակալության համար դագաղներ տեղափոխող բեռնատարի թափքում: Այս մասին հայտնում է Associated Press-ը:
Գործակալության տեղեկություններով՝ «չկայացած» գաղթականները ձերբակալվել են ֆրանսիական Դյունկերկ նավահանգստում: Բեռնատարը, որը Բուլղարիայից տեղափոխվում էր Լոնդոն, մինչ Մեծ Բրիտանիա ուղևորվող նավ մտնելը, սովորական ստուգում է անցել: Հանկարծ բեռնատարի թափքում երեք աֆրիկացու են նկատել: Վերջիններս թաքնվել են ոչ թե դագաղներում, այլ դրանց արանքում:
Գործակալությունը նշում է, որ աֆրիկացի անօրինական գաղթականների կողմից սա տարբեր բեռների արանքում թաքնվելու միջոցով Մեծ Բրիտանիա թափանցելու առաջին փորձը չէ: