Ռուսական Regnum լրատվական գործակալության փոխանցմամբ՝ Բուրկինա Ֆասոյի գյուղերից մեկը վերանվանվել է Թուրքիա: Ինչպես հաղորդում են տեղական ԶԼՄ-ները, թուրքական բարեգործական ընկերությունները վերջին 3 տարիներին օգնություն են ցուցաբերել այդ երկրին, և որպես երախտագիտության նշան՝ Տրանսալիա գյուղի բնակիչները որոշել են այն վերանվանել Թուրքիա:
Պաշտոնական Անկարան, հայտարարելով բազմավեկտոր արտաքին քաղաքականության զարգացման մտադրության մասին, փորձում է ակտիվացնել իր հարաբերությունները աֆրիկյան երկրների հետ: Թուրքիան շարունակում է օգնել աֆրիկյան երկրներին:
Ներկայումս Թուրքիայի դիվանագիտական ներկայացուցչությունները գործում են աֆրիկյան 12 երկրներում: Թուրքիան որոշել է ևս 15 դեսպանատներ բացել Աֆրիկայում, որոնց թվում ընդգրկվել է նաև Տանզանիան:
Թուրքիան ավանդաբար բավական սերտ երկխոսություն է պաշտպանում Հյուսիսային Աֆրիկայի արաբական երկրների հետ, իսկ Սահարայից հարավ ընկած աֆրիկյան երկրները միայն վերջին տարիներին են սկսել արժանանալ թուրքական դիվանագիտության ուշադրությանը: Թուրքիայի համար աֆրիկյան երկրների հետ հարաբերությունների զարգացումն ունի թե՛ քաղաքական, թե՛ տնտեսական նշանակություն: