Ավստրիայի կառավարությունը ողջունում է «Հարավային հոսք» նախագծին երկրի մասնակցությունը՝ հայտարարել է Ավստրիայի էներգետիկայի նախարար Ռայնհոլդ Միթերլեները: Այս մասին հաղորդում է vestifinance.ru-ն:
«Միջազգային իրադարձությունները ցույց են տալիս, որ մենք կարիք ունենք ոչ միայն էներգառեսուրսների աղբյուրների, այլև այդ ռեսուրսների մատակարարման երթուղիների երկարաժամկետ դիվերսիֆիկացման: Բաումգարթեն (Ավստրիայում է- խմբ.) քաղաքում «Հարավային հոսք» գազատարով մենք կմոտենանք այդ նպատակին: Նախագիծը ոչ միայն կապահովի Ավստրիայի էներգետիկ անվտանգությունը, այլև կամրապնդի երկրի դիրքերը որպես եվրոպական էներգետիկ հանգույց, ինչը նախատեսված է մեր էներգետիկ ռազմավարությամբ»,- ասել է Միթերլեները:
«Ավստրիան ԵՄ-ում չորրորդ տեղում է՝ էներգիայի վերականգնվող աղբյուրների օգտագործմամբ, սակայն էներգետիկայի կառուցվածքի վերակազմավորումը մեկ օրում չի լինում: Մենք նաև ապագայում կունենանք գազի կարիք՝ որպես անցումային վառելիքի, ուստի անցած տարիներին կառուցվել են գազատարների լրացուցիչ ուղիներ, ինչպես՝ «Հարավային հոսքը», զգալիորեն ընդլայնվել են գազի պահեստները: Ապագայում էներգիայի չվերականգնվող աղբյուրներից կախվածությունը կրճատելու համար մենք պետք է ավելի արդյունավետ օգտագործենք էներգառեսուրսները և ավելացնենք վերականգնվող էներգառեսուրսների օգտագործումը»,- նշել է նա:
Երեքշաբթի օրը «Գազպրոմի» ղեկավար Ալեքսեյ Միլլերը և ավստրիական OMV ընկերության գլխավոր տնօրեն Գերհարդ Ռոյսը Ավստրիայում «Հարավային հոսք» նախագծի իրագործման վերաբերյալ հուշագիր են ստորագրել:
