«Ես երբեք քառյակ եզրը չեմ օգտագործել, ողջունել եմ այդ համագործակցությունը, սակայն ակնհայտ է, որ գործ ունենք չորս ուժերի հետ, որոնց միասնական օրակարգը տակավին պակասում է իրենց օրացույցից: Հույս ունեի, որ ապրիլին կլինի այդ միասնական հրապարակը, բայց հասկանալով, որ իմ ժամացույցն աշխատում է մի փոքր արագ, քան մյուսներինը, ներկա դրությամբ համարում եմ ցավալի, որ երեկ քվեարկության ժամանակ չկար միահամուռ մոտեցում»,- այսօր լրագրողների հետ հանդիպման ժամանակ ասաց «Ժառանգություն» կուսակցության առաջնորդ Րաֆֆի Հովհաննիսյանը:
«Առաջին լրատվականը» Րաֆֆի Հովհաննիսյանից հետաքրքրվեց Գալուստ Սահակյանի օգտին քվեարկությունից հետո էլ ինչ է հարկավոր «Ժառանգության» համար հասկանալու, որ քառյակի շրջանակներում համագործակցության համար ԲՀԿ-ն հուսալի գործընկեր չէ: «Ես հիմա չպիտի խոսեմ անվստահելի և վստահելի գործընկերների մասին: Պատահում են տարընթերցումներ: Ես կրկնում եմ, որ երեկ բոլոր ու-երի համար ահազանգ հնչեց, բայց ես պատրաստ չեմ ավարտական, վերջնական գնահատական տալ: Ես դեռ հույս ունեմ, որ այդ ուժերը, եթե ցանկանան, ժողովրդի մասնակցությամբ և զորակցությամբ կկարողանան կանխել կառավարության այս ծրագիրը: Իսկ եթե չկանխեցին, եթե միացյալ հրապարակ չստեղծեցին, այն ժամանակ ես իմ վերջնական խոսքը կասեմ»,- եղավ Հովհաննիսյանի պատասխանը:
Նրա խոսքով՝ մինչև մայիսի կեսը, երբ կլինի կառավարության ծրագիրը և դրա շուրջ քվեարկության արդյունքները, այդ ժամանակ նոր իրավիճակ կլինի: «Կառավարության ծրագրի կանխումը այս 4 ուժերի վերջին քննությունը կլինի: Եթե երեկվա քվեարկության պես քվեարկություն կրկնվի կառավարության ծրագրի շուրջ, դա արդեն կծնի քաղաքական նոր իրավիճակ»,- ասաց Հովհաննիսյանը:
«Առաջին լրատվական»-ի հարցին՝ իրեն ի՞նչ է հուշում քոչարյանական կադրերի վերադարձը նոր կառավարություն, Հովհաննիսյանը պատասխանեց. «Կան կադրեր, որոնք ծառայել են Հայաստանի երեք նախագահների օրեք, երկու նախագահների օրոք: Գործող վարչապետի օրինակը վառ ապացույց: Դրա համար պետք չէ կենտրոնանալ մեկի վրա, բայց եթե ձեզ միայն հետաքրքրում է պարոն Քոչարյանը, ապա ես կարծում եմ, որ այդ հարցի պատասխանը մենք բոլորս կիմանանք կառավարության ծրագրի ներկայացման օրը»:
