«Իմ կարծիքով` ստվերի հետ կապված գնահատականներ տալն ընդդիմության մենաշնորհն է, իսկ հարկեր/ՀՆԱ հարաբերակցության 1,1%-ով ավելացումը շատ մեծ թիվ է»,- «Առաջին լրատվական»-ի հետ զրույցում հայտնեց ֆինանսների փոխնախարար Պավել Սաֆարյանը:
Հիշեցնենք, որ ԱԺ-ում 2013 թ. բյուջեի նախագծի քննարկումների ժամանակ ֆինանսների նախարար Վաչե Գաբրիելյանը հայտարարել էր, թե ստվերը տնտեսությունում 30-35% է: Ընդ որում՝ կառավարության ներկայացուցչի կողմից նման գնահատական առաջին անգամ է հնչում:
Պ. Սաֆարյանը նշեց, որ կառավարության ծրագրում սովորաբար նախատեսվում է 0,3-0,4% հարկեր/ՀՆԱ ավելացում, և միջազգային պրակտիկայում այդ 0,4%-ը միջին երկրների այն չափն է, որ կարողանում են բարձրացնել. «Մեզ մոտ հարկեր/ՀՆԱ-ն իրականում չի բարձրանում, քանի որ օրենսդրական փոփոխություններով` մի մեծ կատեգորիայի՝ զինծառայողների եկամուտները չեն հարկվում, հիմա տեղափոխվում են հարկման դաշտ: Դուք պետք է զարմանայիք, թե ոնց դարձավ 1,1%»:
Դիտարկմանը՝ ամեն դեպքում քիչ չէ՞ այս ցուցանիշի ավելացումը` հաշվի առնելով ստվերային, չհարկվող խոշոր բիզնեսի առկայությունը, Սաֆարյանը պատասխանեց. «Ընդհանրապես ստվերային տնտեսության հարկման ավելացումը միշտ պետք է պրոցեսի մեջ լինի: Եթե գունավոր հեղափոխություններ չեն լինում, միանգամից չի կարող լինել, որ արթնանաս ու տեսնես` ստվերը վերանում է: Դուք ավելի լավ է` պրոցեսի մասին խոսեք: Հարկեր/ՀՆԱ-ի ավելացումը նշանակում է ստվերի կրճատում»:
Փոխնախարարի խոսքով՝ հարկեր/ՀՆԱ-ի 1,1% հավելումից զինծառայողների եկամտային հարկը 0,6%-ն է, մնացածը ստվերը և տնտեսական աճն են, որից էլ 2/3-ը տնտեսական աճն է, 1/3-ը՝ ստվերը:
Փոխնախարարը մեջբերեց Վրաստանի օրինակը. այնտեղ, երբ առաջին անգամ հայտարարեցին հարկեր/ՀՆԱ-ն 5%-ային կետով ավելացնելու մասին, դրանում մտցրել էին սոցվճարները, սեփականաշնորհումը, տուգանքները, և արդյունքում միանգամից 5% ավելացում գրանցվեց:
Հարցին՝ հիմա մեր սոցվճարները, հանած իրական հավելումը, ինչքա՞ն են, Պ. Սաֆարյանը պատասխանեց, թե չեք կարող սոցվճարները հանել, քանի որ եկամտահարկն ու սոցվճարները միացվել են եկամտային հարկի մեջ: «Տեսականորեն պետք է թուղթ ու գրիչ վերցնեմ, հաշվեմ: Իմ կոմպյուտերային ծրագիրը տենց չի աշխատում»,- նկատեց փոխնախարարը, ապա քիչ մտորելուց հետո հավելեց, որ առանց սոցվճարների 2012թ.-ի բյուջեի 17,4% հարկեր/ՀՆԱ-ի իրական աճը 0,3% է լինում:
